मुंबई, ता. १ : पश्चिम रेल्वेच्या रेल्वे सुरक्षा बलाने गेल्या पाच महिन्यांत ‘ऑपरेशन अमानत’अंतर्गत ३.१६ कोटी किमतीचे सामान प्रवाशांना परत केले आहे. यामध्ये मोबाईल, लॅपटॉप, दागिने, रोख रक्कम आदी वस्तूंचा समावेश आहे. जानेवारी ते मे २०२३ पर्यंत ‘ऑपरेशन अमानत’ अंतर्गत रेल्वे सुरक्षा बलाच्या (आरपीएफ) जवानांनी १ हजार ४३७ प्रवाशांच्या सुमारे ३.१६ कोटी रुपयांच्या वस्तू परत केल्या. यामध्ये ८३८ बॅग, ५३ पर्स, १२ लॅपटॉप, ३० मोबाईल, १४ सोनसाखळ्या आणि ३,१५,९९,५७६ रुपये किमतीच्या १६० इतर वस्तूंचा समावेश आहे. २४ मे २०२३ रोजी मुंबई विभागाच्या आरपीएफ विभागाने विविध स्थानकांवर १२ वेगवेगळ्या प्रकरणांमध्ये सुमारे एक लाख ७९ हजार ५०० रुपये किमतीच्या हरवलेल्या वस्तू परत मिळवून त्यांच्या मालकांकडे सुपूर्द केल्या.