उल्हासनगर, ता. १ (वार्ताहर) : राष्ट्रवादी काँग्रेसने उल्हासनगरात आयोजित केलेल्या आढावा बैठकीत माजी मंत्री जितेंद्र आव्हाड यांनी सिंधी समाजाबद्दल आक्षेपार्ह विधान केले होते. आव्हाड यांचे बोलणे त्यांना भोवले असून त्यांच्याविरुद्ध शिवसेना, भाजपने आंदोलन केले आहे; तर भाजपने दिलेल्या तक्रारीवरून जितेंद्र आव्हाड यांच्यावर हिललाईन पोलिस ठाण्यात गुन्हा दाखल करण्यात आला आहे.

२७ मे २०२३ रोजी राष्ट्रवादी काँग्रेस उल्हासनगर शहर जिल्ह्याच्या वतीने आढावा बैठक व सार्वजनिक प्रवेश कार्यक्रमाचे आयोजन करण्यात आले होते. या सभेत कार्यकर्त्यांना संबोधित करताना राष्ट्रवादीचे नेते डॉ. जितेंद्र आव्हाड यांनी सिंधी समाजाविषयी आक्षेपार्ह विधान केले होते. या कार्यक्रमासाठी राष्ट्रवादी काँग्रेसच्या गंगोत्री गटाला निमंत्रण देण्यात आलेले नव्हते. त्यामुळे संतप्त झालेल्या गंगोत्री यांनी प्रसिद्धी पत्रकाद्वारे जितेंद्र आव्हाड, माजी खासदार आनंद परांजपे, पप्पू कलानी आणि ओमी कलानी यांचा निषेध व्यक्त केला होता. त्यानंतर त्यांनी वरील वक्तव्य केले. मात्र त्यामुळे सिंधी समाजाच्या भावना दुखावल्या होत्या. त्यांच्या या कार्यक्रमाचे व्हिडीओ सोशल मीडियावर व्हायरल झाले होते. शिवसेना महानगरप्रमुख राजेंद्र चौधरी, आमदार डॉ. बालाजी किणीकर यांच्या नेतृत्वाखाली जितेंद्र आव्हाड यांच्या या वक्तव्याचा निषेध व्यक्त करून ‘जोडे मारो’ आंदोलन करण्यात आले. तसेच भाजपचे आमदार कुमार आयलानी, शहर अध्यक्ष जमनू पुरस्वानी यांच्या नेतृत्वाखाली नेहरू चौकात आंदोलन करण्यात आले आहे.

-----------------
भावना दुखावण्याचा हेतू नव्हता
जितेंद्र आव्हाड यांनी त्यांचे म्हणणे स्पष्ट केले आहे. राष्ट्रवादी काँग्रेसच्या एका सिंधी नेत्याबाबत हे वक्तव्य केले होते, जो पक्षात राहूनदेखील पक्षविरोधी कारवाया करतो. या वक्तव्याला सिंधी समाजाशी जोडू नये, माझा कोणाच्याही भावना दुखावण्याचा हेतू नव्हता. माझे अनेक सिंधी मित्र आणि हितचिंतक असून मी समस्त सिंधी समाजाचा आदर करतो, असे त्यांनी म्हटले आहे.