दिवा-रत्नागिरी पॅसेंजर गाडीचा
दादर-सीएसएमटीपर्यंत विस्तार करण्याची मागणी
मुंबई, ता. ६ : रत्नागिरी-दादर पॅसेंजर गाडी आता दिवा रेल्वेस्थानकातून सुटत असल्याने पश्चिम उपनगरात राहणाऱ्या कोकणवासीयांना त्रास सहन करावा लागत आहे. त्यामुळे दिवा-रत्नागिरी पॅसेंजर रेल्वेगाडीचा विस्तार दादर किंवा छत्रपती शिवाजी महाराज टर्मिनसपर्यंत करण्याची मागणी प्रवासी संघटनेकडून करण्यात आली आहे.
झीरो बेस्ड टाइमटेबल अंतर्गत यापूर्वीची रत्नागिरी-दादर अशी धावणारी पॅसेंजर गाडी सध्या दिवा स्थानकापर्यंतच चालवण्यात येत आहे. परिणामी प्रवाशांना त्रास सहन करावा लागत आहे. त्याचबरोबर मध्य रेल्वेने रत्नागिरी-दादर पॅसेंजरचे दिवा-रोहा मार्गावरील जवळपास नऊ थांबे रद्द केले आहेत; मात्र प्रवासाचा वेळ वाचलेला नाही. पनवेलमध्ये पाणी भरण्यासाठी दिवा-रत्नागिरी पॅसेंजर ३० ते ४५ मिनिटे थांबवावी लागते. गाडीच्या सुरुवातीच्या स्थानकातच पाणी भरले गेले पाहिजे, अशा रेल्वे बोर्डाच्या सूचना असूनही त्याचे पालन केले जात नाही. नऊ थांबे कमी करूनही गाडीच्या प्रवास वेळेत काहीही घट झालेली नाही. एकूण प्रवास वेळेत केवळ १० ते २० मिनिटे कपात झाली आहे. प्रत्यक्षात एका थांब्यासाठी ८-१० मिनिटे गृहित धरल्यास किमान एक तासाची घट अपेक्षित होती. त्यामुळे मध्य रेल्वेने डाऊन दिशेने जाणाऱ्या दादर-रत्नागिरी पॅसेंजर गाडीत दिव्यासाठी काही अनारक्षित डबे निश्चित करून ती दादर किंवा सीएसएमटीपर्यंत वाढवण्याची मागणी रेल्वे अभ्यासक अक्षय महापदी यांनी केली आहे.