वसई, ता. ६ (बातमीदार) : हिंदवी स्वराज्य संस्थापक छत्रपती शिवाजी महाराज यांचा ३५० वा राज्याभिषेक सोहळ्याचा आनंद वसई तालुक्यात मोठ्या उत्साहात साजरा करण्यात आला. वसईतील कलाशिक्षक व सुप्रसिद्ध चित्रकार कौशिक जाधव यांनी रंगसंगतीतून वारली चित्रकलेच्या माध्यमातून शिवराज्याभिषेक सोहळ्याचे चित्र रेखाटले आहे.
पालघर जिल्हा आदिवासीबहुल क्षेत्र आहे. या ठिकाणी वारली चित्रकलेला अनन्यसाधारण महत्त्व आहे. त्यामुळे वसईतील भाताणे गावात राहणारे चित्रकार कौशिक दिलीप जाधव यांनी वारली चित्रकलेतून शिवराज्याभिषेक सोहळा सादर केला आहे. या कलाकृतीसाठी जलरंगाचा वापर केला असून एका तासात पूर्ण केली आहे. पर्यावरण, निसर्ग संवर्धनासाठी चित्रकलेतून जनजागृती करत आहे. पहिल्यांदा वारली चित्रकलेतून छत्रपती शिवाजी महाराजांना मानाचा मुजरा कलाकृतीतून दिला आहे, असे चित्रकार कौशिक जाधव यांनी सांगितले.

----------------
वसई : कुंचल्यातून चित्रकार कौशिक जाधव यांनी रेखाटलेला शिवराज्याभिषेक सोहळा.