नेरूळ, ता. १० (बातमीदार) : सीवूड सेक्टर ५० येथील भूखंड क्रमांक २ वर सिविक सेंटर व इंदोर स्टेडियमची उभारणी करावी, यासाठी वास्तू विशारदाची नियुक्ती करावी, अशी मागणी माजी नगरसेवक विशाल डोळस यांनी नवी मुंबई महापालिका आयुक्त राजेश नार्वेकर यांच्याकडे केली आहे. आमदार गणेश नाईक यांच्या नेतृत्वाखाली नवी मुंबई महापालिकेचे आयुक्त राजेश नार्वेकर यांच्यासोबत नवी मुंबईतील विविध समस्यांबाबत झालेल्या बैठकीत माजी नगरसेवक विशाल डोळस यांनी प्रभागात विविध नागरी सुविधा नसल्याचे आयुक्त राजेश नार्वेकर यांना निदर्शनास आणून दिले. पालिका स्थापन झाल्यापासून या ठिकाणी क्रीडाप्रेमी सिविक सेंटर व इंडोअर स्टेडियम उभारणीसाठी सातत्याने मागणी करत असल्याचे सांगितले. गेली अनेक सिडकोचे ना हरकत प्रमाणपत्र नसल्याने हा विषय प्रलंबित राहिला होता; परंतु महापालिकेचा विकास आराखडा प्रसिद्ध झाल्याने ना हरकतीचा विषय संपुष्टात आला आहे. त्यामुळे भूखंडावर आता सिविक सेंटर उभारणीची अडचण दूर झाली आहे, त्यासाठी आता वास्तुविशारदची नेमणूक करावी, अशी मागणी यावेळी करण्यात आली.