श्रीवर्धन, ता. ११ (बातमीदार) : किडनी विकाराने त्रस्त असलेल्या रुग्णांना सध्या एसटीमध्ये शंभर किलोमीटर प्रवासाला शंभर टक्के सवलत आहे. मात्र हीच सवलत किलोमीटरची न अट न ठेवता पूर्णतः करण्याची मागणी रुग्ण करत आहेत. श्रीवर्धन तालुक्यातील दांडा येथील रितेश तोडणकर हे गेली अकरा वर्षांपासून किडनीविकाराने त्रस्त असून आठवड्यातून दोनदा डायलिसिस करत आहे. मात्र माणगाव येथील रुग्णालयात डायलिसिससाठी रुग्ण संख्या पूर्ण झाल्याने तिथे डायलिसिस होत नाही किंबहुना पेण येथे डायलिसिससाठी जावे लागते. श्रीवर्धन ते पेण हे ११५ किलोमीटरवर आहे आणि शासन फक्त शंभर किलोमीटरपर्यंतच डायलिसिस रुग्णांना प्रवासात शंभर टक्के सवलत देते. जाण्यायेण्यात दोनशे तीस किलोमीटर होतात. तोडणकर यांना महिन्याला आठ वेळा पेण येथे जावे लागते. माझ्यासारख्या अनेकांना हा प्रवास अतिशय मानसिक त्रास व खर्चिक असतो, असे तोडणकर यांनी सांगितले. त्यामुळे अशा डायलिसिस रुग्णांना शंभर टक्के सवलतीची देण्याची मागणी रुग्णांकडून होत आहे.