अलिबाग, ता. १४ (बातमीदार) ः जानेवारी ते डिसेंबर २०२३ या कालावधीत मुदत संपणाऱ्या, नवनिर्मित व २०२२ मध्ये चुकीची प्रभाग रचना, आरक्षण झाल्यामुळे निवडणुका होऊ शकल्या नाहीत, अशा ग्रामपंचायतींच्या निवडणुकांसाठी नव्याने आरक्षण सोडतीचा कार्यक्रम निवडणूक विभागाने जाहीर केला आहे. जिल्ह्यातील २०७ ग्रामपंचायतीचा यात समावेश असल्याची माहिती जिल्हा प्रशासनाकडून देण्यात आली आहे.
ग्रामपंचायत आरक्षण सोडतीचा कार्यक्रम १६ जून ते १७ जुलै या कालावधीत होणार आहे. त्यामध्ये १६ जून रोजी आरक्षण सोडत काढण्यासाठी विशेष ग्रामसभेची सूचना देणे. २१ जून रोजी विशेष ग्रामसभा बोलावून, तहसीलदार यांनी नियुक्त केलेल्या अधिकाऱ्यांच्या अध्यक्षतेखाली अनुसूचित जाती महिला, अनुसूचित जमाती महिला, नागरिकांचा मागास प्रवर्ग, नागरिकांचा मागास प्रवर्ग महिला, व सर्वसाधारण महिला आरक्षण सोडत काढणे, २२ जून रोजी आरक्षण सोडतीनंतर प्रभागनिहाय आरक्षणाचे प्रारूप प्रसिद्ध करणे, प्रभागनिहाय आरक्षण निश्‍चितीबाबत हरकती व सूचना २३ ते ३० जून या कालावधीत दाखल करणे, ६ जुलै रोजी उपविभागीय अधिकारी यांनी प्राप्त हरकती विचारात घेऊन अभिप्राय देणे, १२ जुलै रोजी उपविभागीय अधिकारी यांचा अभिप्राय विचारात घेऊन अंतिम अधिसूचनेस जिल्हाधिकारी यांनी मान्यता देणे तसेच १४ जुलै रोजी अंतिम प्रभाग रचनेला व्यापक प्रसिद्धी देणे ही प्रक्रिया पार पडणार असल्याची माहिती प्रशासनाकडून देण्यात आली.