बोर्डी, ता. १८ (बातमीदार) : पश्चिम रेल्वेवरील गुजरात राज्यातील संजाण रेल्वेस्थानकाच्या उत्तरेला रेल्वे फाटक बंद करून उभारण्यात आलेल्या नवीन उड्डाण पुलाला उद्‍घाटनापूर्वीच भगदाड पडल्यामुळे उड्डाणपूल वाहतुकीसाठी बंद करण्यात आला आहे. दुरुस्तीचे काम पूर्ण झाल्यानंतर पूल वाहतुकीसाठी खुला करण्यात येणार आहे. तोपर्यंत संजाण रेल्वेस्थानकाच्या दक्षिणेला असलेल्या अंडरपासमधून वाहनांची वाहतूक करण्यासाठी रेल्वेस्थानकाच्या पूर्वेला सुमारे अर्धा किलोमीटर पर्यायी रस्त्याची व्यवस्था करून देण्यात आली आहे.
बिपरजॉय वादळाच्या दरम्यान झालेल्या हलक्या पावसातच ५० कोटी रुपये खर्च करून रेल्वे मार्ग क्रॉसिंग करण्यासाठी बांधण्यात आलेल्या उड्डाण पुलाला उद्‍घाटनापूर्वीच भगदाड पडल्याचे लक्षात आल्यावरून खळबळ माजली होती. या कामाची पाहणी केल्यानंतर प्रशासनाने पुलाच्या पूर्वेकडील भागाची दुरुस्ती करण्याचा निर्णय घेतला आहे. यासाठी संपूर्ण स्लॅब तोडण्याचे काम सुरू करण्यात आले आहे. हे काम पूर्ण करताना बराच कालावधी लागेल, असे गृहीत धरून उड्डाण पुलावरून वाहतूक बंद करण्यात आली आहे; परंतु संजाण पश्चिम भागात असलेले उद्योग आणि उद्योगधंद्यातून उत्पादित होणाऱ्या मालाची वाहतूक करणाऱ्या वाहनांची वर्दळ लक्षात घेता पर्यायी मार्गाची अत्यंत आवश्यकता लक्षात घेऊन रेल्वेस्थानकाच्या पूर्वेला तातडीने खडीकरण करण्यात आले आहे. मुंबई-अहमदाबाद महामार्गाकडे जाणाऱ्या वाहनचालकांनी या रस्त्याचा वापर करावा, अशी सूचना देण्यात आली आहे.