Mumbai News - खारघरला विपुल प्रमाणात नैसर्गिक संपदा लाभलेला खाडीकिनारा आहे. मात्र, डेब्रिज टाकून खारफुटी नष्ट करण्याचा प्रयत्न केला जात आहे.

त्यामुळे खाडी किनाऱ्यालगत नैसर्गिक तलाव, पक्षी अभयारण्य, तसेच वॉकिंग ट्रॅक उभारण्याचा पालिकेने संकल्प केला असून खाडीमधील पाण्याची क्षमता, खोली, परिसरात असलेली झाडे, तसेच उपलब्ध असलेल्या जागांचे सर्वेक्षण सुरू आहे.

सह्याद्रीच्या पर्वतरांगा, विस्तीर्ण खाडीकिनारा लाभलेल्या खारघर शहरात ४८ जमातींचे वेगवेगळे पक्षी आढळतात. खारघर सेक्टर १७ पासून २७ लगत असलेल्या या खाडी किनाऱ्यालगत पाणथळे, खारफुटीची झाडे या पक्ष्यांच्या अधिवासाचे ठिकाण आहे.

मात्र, खारघर सेक्टर १९ मुर्बी गाव आणि संजीवनी शाळेसमोर असलेल्या खाडी किनाऱ्यावर काही जणांकडून डेब्रिज टाकण्यात येत आहे. त्यामुळे खाडी परिसरातील पनवेल पालिकेकडे हस्तांतर झालेल्या परिसरात नैसर्गिक तलाव, पक्षी अभयारण्य तसेच वॉकिंग ट्रॅक उभारण्यात येणार आहे.

पाणथळ संवर्धनावर भर
पालिकेच्या सर्वेक्षण विभागाकडून खाडीमधील पाण्याची क्षमता, खोली, परिसरात असलेल्या झाडांची संख्या, खाडीत किती गाळ आहे, किती जागांवर डेब्रिज आहे. तसेच किती जागेवर विविध प्रकल्प राबवता येऊ शकतात, याविषयी सर्वेक्षण केले जात आहे. ज्या ठिकाणी डेब्रिजचा भराव टाकून खारफुटी आणि पाणथळ परिसर नष्ट करण्याचा प्रयत्न सुरू आहे.

पालिकेकडून खाडी किनारा विकसित केल्यास खारघरच्या सौंदर्यात भर पडेल. तसेच सदर परिसर थंड असल्यामुळे नागरिकांच्या आरोग्यासाठी लाभदायक ठरणार ठरेल.
- मेघनाथ ठाकूर, मुर्बी, ग्रामस्थ

पालिका खाडीलगत तलाव विकसित करीत असेल तर ही आनंदाची बाब आहे. मात्र, या प्रकल्पासाठी सीआरझेड प्राधिकरणाच्या आवश्यक मान्यतेसह नियोजन करणे गरजेचे आहे.
- नरेश सिंग, पर्यावरण प्रेमी

सेक्टर १९ लगत काही खाडी परिसर पालिकेकडे हस्तांतर झाले आहे. त्यामुळे भविष्यात काय करता येईल, याविषयी नियोजन, आराखडा तयार केला जाईल. परिसरात प्रकल्प हाती घेण्यापूर्वी सीआरझेड विभागाकडून परवानगी मिळाल्यानंतर प्रकल्प हाती घेतला जाईल.
- संजय कटेकर, कार्यकारी अभियंता, पनवेल महापालिका