घणसोली, ता.३ (बातमीदार) : घणसोली सेक्टर ५ येथील दिंवगत शिवाजीराव अण्णासाहेब पाटील या उद्यानाची गेल्या अनेक दिवसांपासून दुरवस्था झाल्याचे पहायला मिळाले. याठिकाणी असलेल्या जल कुंभावर झाकण नसल्याने पाण्यात कचरा, अळ्या झाल्याचे पहायला मिळत होते. मात्र या ठिकाणी आता जलकुंबावर झाकण बसवल्याने नागरिकांनी सुटकेचा श्वास घेतला आहे. या उद्यानात लहान मुलांसह वयोवृद्ध नागरिक विरंगुळासाठी येत असत मात्र या ठिकाणी पाण्याची महापालिकेच्या वतीने करण्यात आलेली सोय ही नागरिकांच्या जीवाला धोक्यात घालणारी होती, कारण गेली अनेक महिने या ठिकाणी उद्यानात पिण्यासाठी असलेल्या पाण्याच्या जलकुंभावर कोणताही प्रकारचे झाकण लावण्यात आले नव्हते त्यामुळे या पाण्यामध्ये अनेक किडे, पक्षांची विष्टा आणि पावसाचे पाणी साचत असल्याने नागरिकांच्या जीवाला धोका निर्माण झाला होता. याप्रकरणी मनसेचे नितीन काटेकर यांनी अनेकदा विभाग अधिकाऱ्यांना या संदर्भात कल्पना करून दिली, अखेर त्यांच्या प्रयत्नांना यश आला असून या पाण्याच्या टाकीवर झाकणा लावण्यात आले आहे. त्याचबरोबर आजूबाजूच्या परिसराची देखील स्वच्छता करण्यात आली आहे.