वाडा, ता. ८ (बातमीदार) : वाडा ग्रामीण रुग्णालयात गर्भवतीला प्रसूतीसाठी दाखल केले होते. गुरुवारी (ता. ६) पहाटेच्या सुमारास प्रसूतीचा त्रास होऊ लागल्याने डॉक्टरांनी तिची तपासणी केल्यानंतर ठाणे येथील रुग्णालयात नेण्याचा सल्ला दिला. त्यामुळे तिला रुग्णवाहिकेतून नेत असताना रस्त्यातच अंबाडी येथे पोहोचताच प्रसूती वेदना सुरू झाल्याने चालकाने रुग्णवाहिका रस्त्याच्या कडेला थांबवून प्रसूती केली.

वाडा ग्रामीण रुग्णालयात पूजा पंकज गिंबल (वय २१) या महिलेला प्रसूतीसाठी गुरुवारी पहाटे साडेचार वाजण्याच्या सुमारास ठाणे जिल्हा सामान्य रुग्णालयात पाठवण्याचा निर्णय घेण्यात आला. या रुग्णवाहिकेवरील डॉ. सुशील जाधव यांनी रुग्णालयात जाऊन महिलेची तपासणी केली. सोनोग्राफी अहवालामध्ये बाळ गर्भाशयात आडवे असल्याचे निदर्शनात आले. त्यामुळे पुढील उपचारासाठी महिलेसह जाधव यांनी महिलेला १०८ रुग्णवाहिकेमधून ठाण्याच्या दिशेने रवाना केले. अंबाडीपर्यंत पोहोचताच पूजाला प्रसूती वेदना सुरू झाल्याने चालक नीलेश मोरे यांनी तत्काळ रुग्णवाहिका रस्त्याच्या कडेला थांबवली. जाधव यांनी लगेचच महिलेची तपासणी केली असता बाळाचे पाय बाहेर आल्याचे त्यांच्या निदर्शनास आले आणि त्यांनी शर्थीचे प्रयत्न करून बाळासह मातेला जीवदान दिले. या दोघांनाही ग्रामीण रुग्णालयात दाखल करून त्यांच्यावर उपचार करण्यात आले. आता ते दोघेही सुखरूप असल्याचे रुग्णालयाच्या डॉक्टरांकडून सांगण्यात आले आहे. डॉ. जाधव यांच्या या कामगिरीचे सर्वत्र कौतुक होत आहे.

ठाणे ते वाडा हा प्रवास ६८ किमी असून वाहतूक कोंडी, रस्त्यावरील खड्ड्यांचा सामना करावा लागतो. गर्भवतीला प्रसूतीसाठी ठाणे येथे घेऊन जाताना अनेकदा रुग्णवाहिकेतच प्रसूती होते. या रुग्णवाहिकेला प्रशिक्षित डॉक्टर लाभल्यामुळे गरोदर मातांचा किंवा बाळांचे जीवावर बेतण्याचे प्रसंग टळत आहेत.
- मिलिंद कांबळे,
सहायक जिल्हा व्यवस्थापक, ठाणे-पालघर