वाशी, ता. १० (बातमीदार) : ऐरोली काटाई उन्नत मार्गाच्या कामात अडथळयांची शर्यत सुरु असून ऐरोली पुल ते ठाणे बेलापुर मार्गामध्ये गणेशनगर येथील स्मशनभूमी जवळ महाराष्ट्र राज्य विद्युत वितरण महामंडळाची उच्च दबाची विद्युत वाहिनी गेली असल्याने याठिकाणी पिलर उभे करण्यास अडचण निर्माण होत आहे. त्यामुळे मागील सहा महिन्यांपास येथील पिलर उभे करण्याचे काम बंद आहे.
याठिकाणी एमएमआरडीए क्षेत्राला विद्युत पुरवठा करणारी उच्च दाबाची विद्युत वाहिनी असल्यामुळे शटडाऊन करुन वाहिनी बदलावी लागणार आहे. त्यामुळे या ऐरोली कटाई उन्नत मार्गाच्या प्रकल्पात अडथळे निर्माण होत आहे. शनिवारी खासदार राजन विचारे यांच्या ऐरोली कटाई उन्न्त मार्गाच्या पाहणी दौऱ्याप्रसंगी महावितरणच्या आधिकांऱ्याकडून येत्या दोन महिन्यामध्ये विद्युत वाहिन्या या बदलण्यात येतील, असे आश्वासन दिले गेले. तर एमएमआरडीएच्या आधिकांऱ्यांनी मे २०२४ पर्यत ऐरोली काटई उन्नत मार्गाच्या पहिल्या व दुसऱ्या टप्पातील काम पुर्ण होईल, असा विश्वास व्यक्त केला आहे. त्यामुळे ऐरोली काटाई उन्नत मार्ग सुरु होण्याला तारीख वर तारीख मिळत आहे. मे २०१८ मध्ये ऐरोली कटाई उन्नत मार्गाचे भुमिपुजन झाले होते. तर गेल्या पाच वर्षापासून या मार्गाचे काम सुरु आहे. कोरोनाकाळात कामगार नसल्यामुळे या उन्नत मार्गाचे काम संथगतीने सुरु होते. तर आता महावितरणच्या उच्च दाबाच्या विद्युत वाहिन्यामुळे हे अडथळे निर्माण होत आहे.

दरम्यान खासदार राजन विचारे यांनी केलेल्या या दौऱ्यावेळी एमएमआरडीए अधीक्षक अभियंता साखळकर, कार्यकारी अभियंता राठोड, एमएसइबीचे अधीक्षक अभियंता गायकवाड, महाराष्ट्र स्टेट इलेक्ट्रिसिटी ट्रान्समिशन कंपनीचे अभियंता संजय वाडवे, नवी मुंबई महापालिकेचे कार्यकारी अभियंता सुभाष सोनावणे, वाहतूक शाखेचे पोलिस निरीक्षक संजय बेंडे तसेच शिवसेना जिल्हाप्रमुख विठ्ठल मोरे, उपजिल्हा प्रमुख प्रकाश पाटील, डी.आर. पाटील आदी उपस्थित होते.