नवी मुंबई, ता. १० (वार्ताहर) : उरण तालुक्यातील पिरकोन सारडे मार्गालगत महिलेची गळा चिरून हत्या करण्यात आल्याची घटना सोमवारी (ता. १०) सकाळी उघडकीस आली आहे. उरण पोलिसांनी याप्रकरणी मारेकऱ्याविरोधात हत्येचा गुन्हा दाखल करून मृत महिलेची ओळख पटवण्यासाठी प्रयत्न सुरू केले आहेत. या घटनेतील मृत महिला अंदाजे ४० ते ४५ वयोगटातील असून सोमवारी सकाळी ७ वाजण्याच्या सुमारास या महिलेचा मृतदेह पिरकोन-सारडे रस्त्यालगत एमएसडी हॉटेलजवळ आढळून आला. या घटनेची माहिती मिळताच उरण पोलिसांनी मृतदेह ताब्यात घेतला. धारदार हत्याराने गळा चिरून महिलेची हत्या करण्यात आल्याचे प्राथमिक तपासात आढळून आले आहे. मृत महिलेची ओळख पटवण्यासाठी आजूबाजूच्या परिसरात बेपत्ता असलेल्या महिलांचा शोध घेण्यात येत असल्याची माहिती वरिष्ठ पोलिस निरीक्षक सतीश निकम यांनी दिली.