सकाळ वृत्तसेवा
डोंबिवली, ता. ११ : डोंबिवली पूर्वेतील दावडी येथील श्री राम मंदिरात रविवारी मध्यरात्री चोरीची घटना घडली. चोरट्याने मंदिरातील तीन दानपेट्यांचे कुलपे तोडून त्यातील १५ हजारच्या आसपास असलेली रोकड चोरून नेली आहे. चोरट्याने मंदिराच्या लोखंडी जाळीतील मोकळ्या जागेतून मंदिरात प्रवेश करत ही चोरी केली. ही चोरीची घटना सीसीटीव्हीमध्ये कैद झाली आहे. याप्रकरणी मानपाडा पोलिस ठाण्यात तक्रार दाखल करण्यात आली आहे.
डोंबिवली पूर्वेतील दावडी परिसरात १९८६ मध्ये उभारण्यात आलेल्या श्री राम मंदिरात रविवारी चोरी झाली. दावडी परिसरातील हे सर्वात जुने मंदिर असून एवढ्या वर्षात प्रथमच मंदिरात चोरीची घटना घडली आहे. याप्रकरणी मंदिराचे व्यवस्थापक हरीशंकर पांडेय यांनी मानपाडा पोलिस ठाण्यात गुन्हा दाखल केला आहे. चोरट्याने मंदिरातील तीन दानपेटीचे कुलूप तोडून त्यातील रोख रक्कम चोरली आहे. चोरीची घटना सीसीटीव्हीत कैद झाली असून मध्यरात्री १२.३० च्या सुमारास चोरटा मंदिरात आला असल्याचे दिसत आहे.