सकाळ वृत्तसेवा

मुंबई, ता. ११ : मुंबईतील नालेसफाई १०० टक्के झाल्याचा दावा महापालिका प्रशासनाने केला होता; मात्र तरंगत्या कचऱ्याने नाले तुडूंब भरले आहेत. याबाबतच्या तकारींचा पाऊस पालिकेच्या व्हॉट्सअप चॅटद्वारे पडला आहे. १ जून ते १० जुलैपर्यंत तब्बल ७७७ तक्रारी तरंगता कचरा, डेब्रिजच्या प्राप्त झाल्या आहेत. यात सर्वाधिक तक्रारींची नोंद कुर्ला, अंधेरी पश्चिम, चेंबूर, सांताक्रूझ, भांडुप परिसरातील असल्याचे पालिका प्रशासनाकडून सांगण्यात आले.

पावसाळ्यापूर्वी नालेसफाईचे काम १०० टक्के पूर्ण झाले, असा दावा पालिका प्रशासनाकडून करण्यात आला आहे; मात्र आपल्या प्रभागातील नालेसफाई झाली की नाही, याची तक्रार करण्यासाठी व्हॉट्सअप चॅटबॉट ९३२४५००६०० हा क्रमांक उपलब्ध करण्यात आला. मुख्यमंत्री एकनाथ शिंदे यांच्या आदेशानंतर तक्रारीसाठी व्हॉट्सअप चॅटबॉट १ जूनपासून सुरू करण्यात आला. १ जून ते १० जुलैपर्यंत यात ७७७ तक्रारींची नोंद झाल्याने १०० टक्के नालेसफाईचे काम पूर्ण झाल्याच्या पालिकेच्या दाव्यावर प्रश्नचिन्ह उपस्थित केला जात आहे.

पालिकेकडे प्राप्त ७७७ तक्रारींपैकी मोठ्या नाल्यासंदर्भातील १९१, फ्लोटिंग कचऱ्याच्या १९१ तक्रारी प्राप्त झाल्या होत्या. नाल्यात कचरा, फ्लोटिंग कचरा या तक्रारींची दखल घेत २४ तासांत तक्रारींचे निवारण करण्यात आल्याचे पालिका प्रशासनाकडून सांगण्यात आले.

सर्वाधिक तक्रारी
कुर्ला - ११२
अंधेरी पश्चिम - १११
चेंबूर पूर्व पश्चिम- १११
खार, सांताक्रूझ - ८३
वडाळा, माटुंगा - ५९
भांडुप - ४४
वरळी - २९
मालाड उत्तर - ३१
माहीम धारावी - ३२
घाटकोपर - १५
मुलुंड - १३