मुंबई (बातमीदार) ः जे. के. मीडिया प्रकाशन संस्था आणि नॅशनल लायब्ररी यांच्या वतीने सुप्रसिद्ध बाल साहित्यकार, कथाकथनकार एकनाथ आव्हाड यांना २०२३ चा साहित्य अकादमीचा बालसाहित्य पुरस्कार जाहीर झाला आहे. त्यांच्या दिलीपराज प्रकाशन प्रकाशित ‘छंद देई आनंद’ या बालकाव्यसंग्रहाला हा पुरस्‍कार मिळाला आहे. त्यानिमित्ताने सुप्रसिद्ध अभिनेत्री आणि साहित्यिका डॉ. निशिगंधा वाड यांच्या हस्ते आणि अध्यक्षतेखाली एकनाथ आव्हाड यांचा खास सत्कार सोहळा आयोजित करण्यात आला आहे. सदर कार्यक्रम बुधवार, १२ जुलै २०२३ रोजी सायंकाळी ५ वाजता नॅशनल लायब्ररी वांद्रे सभागृह येथे संपन्न होईल. या वेळी निमंत्रितांच्या बालकाव्य संमेलनाचे आयोजन करण्यात आले आहे. या संमेलनात डॉ. सुमन नवलकर, सूर्यकांत मालुसरे, प्रा. पंढरीनाथ रेडकर, चंद्रकांत कवळी, राजेंद्र वाणी, संतोष खाडये, सुयश देशपांडे, विद्या प्रभू आणि दोन्ही संस्था मिळून चालवत असलेल्या बाल कट्ट्याची मुले बालकविता सादर करतील. कार्यक्रमाचे सूत्रसंचालन पूजा काळे करतील. या कार्यक्रमास रसिकांनी आवर्जून उपस्थित राहावे, असे आवाहन जे. के. मीडियाच्या संचालक ज्योती कपिले आणि नॅशनल लायब्ररीचे प्रमुख कार्यवाहक प्रमोद महाडिक यांनी केले आहे.