आसनगाव, ता. १८ (बातमीदार) : हिंदू धर्मात पिंपळाच्या झाडाला पवित्र स्थान आहे. दर्श अमावास्येच्या सकाळीच उत्तर भारतीय महिलांनी वासिंद रेल्वे स्थानकातील पिंपळाला प्रदक्षिणा घातल्या. हिंदू धर्मात वटपौर्णिमेच्या दिवशी सात जन्म तोच पती मिळावा यासाठी महिला वडाच्या झाडाला प्रदक्षिणा घालतात. उत्तर भारतात मात्र दर्श अमावास्येच्या दिवशी महिला पिंपळाच्या झाडाला प्रदक्षिणा घालतात.

पिंपळ हे वृक्ष भारतीय सदाहरित वनांमधील वृक्ष प्रकार आहे. आयुर्वेदात औषधासाठीदेखील याचा उपयोग होतो. वासिंद परिसरात मोठमया प्रमाणात पिंपाळाची झाडे होती, परंतु विकासाच्या नावाखाली ही झाडे कापण्यात आली. वासिंद रेल्वे स्थानकातील फलाट क्रमांक १ वरील हे महाकाय वृक्ष जर्जर झाल्याने त्याच्या फांद्या पावसाळ्यापूर्वी छाटण्यात आल्या. तरीही वसंत ऋतूत पुन्हा पालवी फुटून प्रवाशांना मोफत प्राणवायू देण्यासाठी सज्ज आहे. महिलांनी धागा गुंडाळून फेऱ्या मारल्या. तसेच पाच फळे व गोडधोड नैवेद्य दाखवून मनोभावे पूजा केली.