डोंबिवली, ता. १८ (बातमीदार) : अखिल भारतीय साहित्य परिषद कल्याणची मासिक बैठक नमस्कार मंडळ आग्रा रोड कल्याण येथे झाली. या मासिक बैठकीस निमंत्रित कवी दिनेश प्रताप सिंग, संजय द्विवेदी, प्रवीण देशमुख उपस्थित होते. कार्यक्रमाची सुरुवात सरस्वती पूजन व दीपप्रज्वलन करून करण्यात आली सरत्या आषाढाला निरोप व श्रावणाचे स्वागत याचे औचित्य साधत दीपपूजन करण्यात आले. सर्व उपस्थित कवींनी हा दिवा प्रज्वलित केला. सामूहिक सरस्वती वंदनेने कार्यक्रमाची सुरुवात झाली. सर्व उपस्थित कवी-कवयित्रींनी दिवा या विषयावरील आपापल्या रचना सादर केल्या. वैविध्यपूर्ण, चिंतनशील अशा आशयाच्या प्रगल्भ कवितांचे सादरीकरण उत्तमरीत्या झाले. श्यामसुंदर पांडे यांनी आपल्या अध्यक्षीय भाषणात दिव्याचे महत्त्व तसेच सादर केलेल्या कवितांचा विशेष उल्लेख करत दिव्याप्रती आपली कृतज्ञता व्यक्त केली. कार्यक्रमाचे सूत्रसंचालन प्राजक्ता कुलकर्णी यांनी केले. सामूहिक पसायदानाने कार्यक्रमाची सांगता झाली.