खारघर, ता. १८ (बातमीदार) : दुर्घटना टाळण्यासाठी खारघर पोलिसांनी धबधबा परिसरात जमावबंदीचे आदेश लागू केले आहेत. मात्र, काही पर्यटक सोमवारी (ता. १७) बंदी झुगारत धबधब्यात मनसोक्‍त भिजण्याचा आनंद घेताना दिसून आले.
खारघर येथील तळोजा मध्यवर्ती कारागृहासमोरील तलावात २२ वर्षीय तरुणाचा बुडून मृत्यू झाल्याची घटना नुकतीच घडली होती. मागील वर्षीही जुलै महिन्यात खारघर डोंगरावर झालेल्या मुसळधार पावसामुळे नाला दुथडी वाहू लागल्याने ७८ महिला, पाच मुले आणि २० पुरुष अडकून पडले होते. असे जवळपास शंभरहून अधिक पर्यटक अडकले होते. या वेळी अग्निशमन जवानांनी नाल्यावर ५० फूट लांब सीडी आणि दोरखंड बांधून सर्व पर्यटकांची सुटका केली. पुन्हा असे प्रकार होवू नये, यासाठी खारघर पोलिसांनी धबधबा, तलाव आदी ठिकाणी जमावबंदीचे आदेश लागू करून पोहण्यास मनाई असे फलक लावले आहे. असे असतानाही सोमवारी पर्यटक बंदी झुगारून सेक्टर पाच येथील धबधब्यावर आनंद घेताना दिसून आले. विशेष म्हणजे पोलिसांकडून दुर्लक्ष केले जात असल्यामुळे नागरिकांमध्ये नाराजी पसरली आहे.