सकाळ वृत्तसेवा
मुंबई, ता. १८ : एका २४ वर्षीय महिलेवर बलात्कार केल्याप्रकरणी १९ वर्षीय आरोपीला पोलिसांनी सोमवारी (ता. १७) अटक केली. २० जुलैपर्यंत त्याला पोलिस कोठडी सुनावली आहे.
पोलिसांनी दिलेल्या माहितीनुसार, कांदिवली परिसरात पीडित आणि आरोपी वास्तव्यास आहेत. गेल्या वर्षी ऑक्टोबरमध्ये पीडितेच्या पतीला अमली पदार्थाच्या गुन्ह्यात अटक करण्यात आली होती. तेव्हापासून ती एकटी घरात वास्तव्यास आहे. पीडित महिलेची एकाच इमारतीत दोन घरे आहेत. दोघे एकमेकांचे शेजारी आहेत. रविवारी महिला साफसफाई करण्यासाठी तिच्या दुसऱ्या घरात गेली असता आरोपीने चोरून घरात प्रवेश केला आणि दरवाजा आतून बंद केला. पोलिसांना दिलेल्या तक्रारीत, आरोपीने तिचे तोंड दाबले आणि तिला आरडाओरडा बंद करण्यास सांगितले. तसे न केल्यास ठार मारल्याची धमकी दिली, असे म्हटले आहे. पुढे आरोपींनी तिच्यावर जबरदस्तीने बलात्कार केल्याचे पीडितेने तक्रारीत सांगितले आहे.