मोखाडा, ता. २६ (बातमीदार) : मणिपूरमध्ये आदिवासी महिलेची विवस्त्र धिंड काढून अश्लील वर्तन केल्याप्रकरणी त्याचा देशभरातून निषेध केला जात आहे. त्याचे पडसाद मोखाडा तालुक्यातही उमटले आहेत. मोखाडा आणि खोडाळा या दोन्ही बाजारपेठेतून आदिवासी संघटनांनी मोर्चा काढून निषेध नोंदवला. खोडाळा येथे आदिवासी विकास हक्क परिषद आणि सर्व आदिवासी संघटना यांच्याकडून खोडाळा शहरातून रॅली काढून काळे झेंडे घेत पोलिसांना निषेधाचे निवेदन देण्यात आले. या रॅलीचे नेतृत्व उपसभापती प्रदीप वाघ, जिल्हा परिषद सदस्य कुसुम झोले, मिलिंद झोले, एकनाथ झुगरे, विष्णू हमरे, तसेच खोडाळा भागातील सरपंच, सदस्य आणि आदिवासी संघटनांचे पदाधिकारी उपस्थित होते.

मोखाडा बाजारपेठेत जिल्हा परिषद अध्यक्ष प्रकाश निकम यांच्या नेतृत्वाखाली शहरातून तहसीलदार कार्यालयापर्यंत पायी रॅली काढत निषेध केला. या वेळी तहसीलदार मयूर खेंगले यांना निषेधाचे पत्र देण्यात आले. तालुक्यातील बहुतांश सरपंच, विविध पक्षांचे पदाधिकारी आणि महिलांचा मोठा सहभाग होता. मणिपूर आणि सातारा जिल्ह्यातील फलटण तालुक्यातील घटना भारतीयांसाठी अपमानास्पद आहे. त्यामुळे आदिवासी दिन यंदा उत्साहात करण्याऐवजी साध्या पद्धतीने तो साजरा करावा, असे आवाहन जिल्हा परिषदेचे अध्यक्ष प्रकाश निकम यांनी केले आहे.