विरार, ता. २६ (बातमीदार) : शिवाजी विद्यापीठाने यंदाचा ॠत्वीज काळसेकर काव्य पुरस्कार वसई येथील कवी वर्जेश सोलंकी यांना जाहीर केला आहे. मराठीतील जेष्ठ कवी, सतीश काळसेकर यांच्या स्मृती प्रीत्यर्थ काळसेकर कूटूंबियांनी विद्यापीठाकडे देणगी दिली. त्यातून काळसेकर यांच्या नावाने प्रतिवर्षी मराठी कवितेत आपले योगदान देणा-याना कवींना ॠत्वीज काळसेकर पुरस्कार देण्यात येतो. या पुरस्काराचे स्वरुप रूपये १०,०००/- असून कवी वर्जेश सोलंकी यांना त्यांच्या वेरविखेर या बहुचर्चित कवितासंग्राहाला जाहीर झालेला आहे. नव्वदीच्या दशकातले एक महत्वाचे कवी म्हणून त्यांच्याकडे पाहिले जाते. बदलता भवताल, व्यवस्थेने दबलेला माणूस आणि स्थिती त्यांच्या कवितेमधून दिसून येते. या पूर्वीसुद्धा कवितेच्या योगदानासाठी भवरलाल जैन फाउंडेशनचा रुपये १ लक्षचा पुरस्काराने त्याना सन्मानित केले होते. ॠत्वीज काळसेकर ह्यांच्या स्मरणार्थ पुरस्कार मिळणे ही मोठी उपलब्धी आहे अशा भावना त्यांच्याशी संवाद साधताना त्यानी व्यक्त केल्या.