नवी मुंबई, ता. २६ (वार्ताहर) : माझी वसुंधरा अभियान ४.० च्या प्रभावी अंमलबजावणीसाठी, तसेच आझादी का अमृत महोत्सवांतर्गत ‘मेरी मिट्टी मेरा देश’ अभियानाबाबत प्रशासकीय यंत्रणांना मार्गदर्शन केले जात आहे. याच अनुषंगाने कोकण विभागीय आयुक्त डॉ. महेंद्र कल्याणकर यांच्या अध्यक्षतेखाली पनवेलमधील आद्य क्रांतिवीर वासुदेव बळवंत फडके नाट्यगृहात विभागस्तरीय कार्यशाळा होणार आहे.
निसर्गाशी असलेली कटिबद्धता वृद्धिंगत करण्यासाठी निसर्गाशी संबंधित भूमी, जल, वायू, अग्नी आणि आकाश या पंचतत्वांना विचारात घेऊन राज्यामध्ये २ ऑक्टोबरपासून ‘माझी वसुंधरा अभियान’ राबवण्यात येत आहे. माझी वसुंधरा अभियान ४.० चा शुभारंभ १५ जून रोजी झाला असून या अभियानात कोकण विभागातील सर्व महापालिका, नगर परिषदा, नगरपंचायती तसेच सर्व ग्रामपंचायतींनी सहभाग नोंदवला आहे. या अभियानांतर्गत स्थानिक संस्थांना काम करण्यासाठी मिळणारा कालावधी १२ महिन्यांचा आहे. माझी वसुंधरा अभियान ४.० ची प्रभावीपणे अंमलबजावणी होण्याच्या उद्देशाने कार्यशाळेस राज्यस्तरावरून माझी वसुंधरा अभियान संचालनालय, मुंबईतील पर्यावरण व वातावरणीय बदल विभागाचे अभियान संचालक सुधाकर बोबडे हे मार्गदर्शन करणार आहेत.
----------------------------------------------
या अभियानामध्ये २५ ते २९ वयोगटातील तरुणांनी सहभागी होऊन सर्व सण पर्यावरणपूरक पद्धतीने साजरे करावेत. तसेच वृक्षारोपणाला प्राधान्य देत ‘माझी वसुंधरा अभियान’ ४.० हे यशस्वी करावे.
-डॉ. महेंद्र कल्याणकर, आयुक्त (कोकण विभाग)