भगवान खैरनार : सकाळ वृत्तसेवा
मोखाडा, ता. २६ : मोखाड्यातील अतिदुर्गम कुर्लोद ग्रामपंचायतीमधील शेड्याचा पाडा येथील सुरेखा लहू भागडे या आदिवासी गर्भवती महिलेला नदीच्या प्रवाहातून लाकडी ओंडक्यावर बसून रस्त्याचे दुसरे टोक गाठावे लागले. या घटनेचे पडसाद विधानसभेतही उमटले. ‘सकाळ’ने ही बातमी प्रसिद्ध करून शासनाचे लक्ष वेधले आहे. या बातमीची दखल घेत येथील नागरिकांना पावसाळ्यात गारगाई नदीपार करण्यासाठी शासनाने येथे बोट उपलब्ध करून तात्पुरती व्यवस्था केली आहे. येथील
कुर्लोद ग्रामपंचायतीमध्ये नऊ पाड्यांचा समावेश होतो. यामध्ये कुर्लोद, गावठाण, वडपाडा, मानीपाडा आणि पेठेपाडा हे गारगई-पिंजाळ नदीच्या अलीकडच्या बाजूने वसलेले आहेत; तर रायपाडा, आंबेपाडा, जांभूळपाडा आणि शेड्याचा पाडा हे चार पाडे नदीच्या पलीकडे वसले आहेत. त्यामुळे येथील आदिवासींचा पावसाळ्यात नदीला पूर आल्यानंतर संपर्क तुटतो. या चार पाड्यांतील नागरिकांना पावसाळ्यात कुठल्याच सुविधा मिळत नाहीत. आरोग्य सेवा न मिळाल्याने आतापर्यंत अनेकांना जीवही गमवावे लागले आहेत. शैक्षणिक व्यवस्थाही कोलमडते. त्यामुळे नदीवर पूल बांधण्याची येथील नागरिकांची अनेक वर्षांची मागणी आहे.
दरम्यान, हे चार पाडे संपर्कात यावेत म्हणून शासनाने फेब्रुवारी महिन्यात गारगई-पिंजाळ नदीवर पूल बांधण्यास मंजुरी दिली आहे. त्यासाठी ५ कोटी ८५ लाख रुपयांचा निधी उपलब्ध करून दिला आहे. त्याचे अंदाजपत्रक बनवून तांत्रिक मंजुरीसाठी पाठविण्यात येणार असल्याची माहिती सार्वजनिक बांधकाम विभागाचे उपअभियंता विशाल अहिरराव यांनी दिली आहे. त्यामुळे येथे वर्षभरात पूल बांधण्याच्या तसेच आदिवासी मुख्य प्रवाहात येण्याच्या आशा पल्लवित झाल्या आहेत.

सरकारची तात्पुरती मलमपट्टी
आदिवासी गर्भवती महिलेला नदीच्या प्रवाहातून ओंडक्यावर बसून रस्त्याचे दुसरे टोक गाठावे लागल्याची बातमी ‘सकाळ’ने प्रसिद्ध केल्यानंतर सरकार आणि यंत्रणा खडबडून जागी झाली. या घटनेचे पडसाद विधानसभेतही उमटले आहेत. त्यामुळे येथील नागरिकांना पावसाळ्यात नदी पार करण्यासाठी शासनाने बोटीची व्यवस्था केली आहे. तसेच ती बोट आजच उपलब्ध होणार असल्याची माहिती तहसीलदार मयूर खेंगले यांनी दिली आहे. मात्र ही सरकारची तात्पुरती मलमपट्टी असल्याचे स्थानिकांचे म्हणणे आहे.