सकाळ वृत्तसेवा
डोंबिवली, ता. ३१ : सोसायटी आवारात भंगार विक्रेते येतात तसाच एक चोराटा भंगारवाला बनून आला आणि सोसायटीच साफ करून गेल्याची घटना कल्याण परिसरात घडली आहे. भंगार विक्रेता बनून त्याने सोसायटीत रेकी केली. त्यानंतर सोसायटीमधील जिमचे साहित्य, बाथरुमचा लोखंडी दरवाजा, पाण्याची जुनी मोटार व इतर लोखंडी साहित्य चोरट्याने चोरून नेले आहे. भर दुपारी चोरट्याने हात साप केला असून ही सर्व घटना सीसीटीव्ही मध्ये कैद झाली आहे. याप्रकरणी खडकपाडा पोलिस ठाण्यात तक्रार दाखल करण्यात आली आहे.
कल्याण पश्चिमेतील बिर्ला कॉलेज रोड परिसरातील जितेश सोसायटीमध्ये ही चोरीची घटना शुक्रवारी दुपारी घडली. दुपारी सोसायटी परिसरात शांतता असल्याचा फायदा घेत चोरटा आवारात शिरला. आपल्यावर चोरीचा संशय येऊ नये म्हणून त्याने भंगार बाटलीवाला अशी आरोळी ठोकण्यास सुरुवात केली. त्यानंतर सोसायटीची रेकी करत त्याने कोठे कोठे काय सामान आहे, हे पाहिले. सोसायटीत कोणी ही येत जात नाही हे पाहून त्याने तेथे बाजूला असलेला लोखंडाचा दरवाजा, जिमचे साहित्य, पाण्याची जुनी मोटार यांसह अनेक लोखंडी वस्तू लंपास केल्या आहेत. सोसायटीच्या आवारातून या वस्तू गायब झाल्यानंतर नागरिकांनी सीसीटीव्ही तपासले असता हा प्रकार समोर आला.