मनोर, ता. ३१ (बातमीदार) : तारापूर औद्योगिक वसाहतीमध्ये रविवारी (ता. ३०) संशयास्पद उभा असलेला रासायनिक सांडपाण्याचा टँकर बोईसर पोलिसांनी जप्त केला आहे. टँकरमधील सांडपाण्याचे नमुने घेण्यासाठी पोलिसांनी महाराष्ट्र प्रदूषण नियंत्रण मंडळाला पत्र दिले आहे. तारापूर औद्योगिक वसाहतीमध्ये मानवी आरोग्य व पर्यावरणास घातक असे रासायनिक सांडपाणी वाहून नेणारा टँकर संशयास्पद उभा होता. टँकरमधील सांडपाण्याची रस्त्यावर गळती होत असल्याची तक्रार बोईसर पोलिसांना प्राप्त झाली होती. तक्रार प्राप्त होताच सहायक पोलिस निरीक्षक सतीश गवई यांनी घटनास्थळी जाऊन गळती होत असलेला टँकर ताब्यात घेतला.
रासायनिक सांडपाण्याचा टँकर यतीन पिंपळे यांच्या मालकीचा असल्याचे पोलिसांनी सांगितले असून टँकरच्या चालकाचा जबाब नोंदवण्यात आला आहे. तर टँकरच्या कागदपत्रे तपासणीत टँकरचे योग्यता (फिटनेस) प्रमाणपत्राची मुदत संपल्याचे समोर आले आहे.