सकाळ वृत्तसेवा
ठाणे, ता. ३१ : मनोहर भिडे हे खोटारडे असून त्यांनी सातत्याने महापुरुष, समाजसुधारकांच्या बाबतीत अवमानकारक विधाने केली आहेत. भिडे हे समाजघातक असून त्यांना वेळीच ठेचण्याची गरज असल्याची मागणी करून राष्ट्रवादी काँग्रेसचे राष्ट्रीय सरचिटणीस आमदार डॉ. जितेंद्र आव्हाड यांनी मनोहर भिडे यांना अटक करण्याची मागणी केली. बुधवारपर्यंत भिडेंना अटक न केल्यास सभागृह चालू न देण्याचा इशाराही त्यांनी या वेळी सरकारला दिला. आव्हाड यांनी सोमवारी नौपाडा पोलिस ठाण्यात भिडे यांच्याविरोधात तक्रार दाखल केली असून गुन्हा दाखल करण्यात आला आहे.
सोमवारी (ता. ३१) घेतलेल्या पत्रकार परिषदेत डॉ. जितेंद्र आव्हाड यांनी मनोहर ऊर्फ संभाजी भिडे यांचा बुरखा फाडला. मनोहर भिडे यांनी महात्मा गांधी यांच्याबद्दल आणि महामानव महात्मा फुले यांच्याबद्दल गलिच्छ शब्दांत टीपण्णी केली. ते ज्या भाषेत बोलले ती भाषा या देशाची संस्कृती नाही. दरवेळेस मुस्लिमांबद्दल बोलून त्यांना निष्कारण ओढून द्वेष निर्माण करण्याचा त्यांचा हेतू असतो. यापूर्वी ते पंडित नेहरू आणि इंदिरा गांधी यांच्याबद्दलही बोलले होते. अनेक समाजसुधारक, स्वातंत्र्य सैनिक यांच्याबाबत अत्यंत गलिच्छ शब्दांत बोलणारे भिडे अकरावी पासही नाहीत. जो माणूस महात्मा गांधींच्या चारित्र्याविषयी शंका घेतो, त्याला काय म्हणावे. नेमके बहुजन समाजाविषयीच ते का बोलतात? बहुजन समाजाविषयी त्यांच्या मनात एवढा द्वेष का आहे? असे प्रश्‍न आव्हाड यांनी केले.

--------------
भिडेंच्या सभेला परवानगी कशी मिळते?
भिडे एवढे प्रक्षोभक बोलतात, मुस्लिम, ओबीसी, बहुजन, महापुरुष यांच्याबद्दल आक्षेपार्ह विधाने केली जातात. तरीही त्यांच्या सभेला परवानगी मिळते. यातच खरी गोम आहे. त्यांना परवानगी मिळतेच कशी, याचा अर्थ काय?, असा सवालही आव्हाड यांनी उपस्थित केला. येत्या बुधवारपर्यंत भिडेंना अटक करण्यात आली नाही तर बुधवारी सभागृह चालू द्यायचे नाही, असे आवाहन आपण समस्त आमदारांना करत असल्याचेही आव्हाड यांनी या वेळी सांगितले.

------------
संभाजी भिडेंवर गुन्हा दाखल करण्यात आला आहे, पण महाराष्ट्रात उठाव झाला पाहिजे. महाराष्ट्र हा फुले, शाहू, आंबेडकर यांचाच आहे. मणिपूरवरील लक्ष विचलित करण्यासाठीच भिडेंना पुढे केले. आता भिडेंना जर अटक केली नाही तर ठाण्यात आंदोलन पेटणार.
- डॉ. जितेंद्र आव्हाड, सरचिटणीस, राष्ट्रवादी काँग्रेस