भिवंडी, ता. ३१ (बातमीदार) : शहरातील नारपोली भागात धोकादायक इमारतीवर कारवाई करण्यापूर्वी प्रतिबंधक उपाययोजना म्हणून वीज खंडित करण्यासाठी गेलेल्या टोरेंट वीज कंपनीच्या कर्मचाऱ्यांवर हल्ला झाल्याची घटना घडली होती. या हल्ल्याप्रकरणी पोलिसांनी अटक केलेल्या मनसे अध्यक्ष मनोज गुळवी आणि सात जणांना सोमवारी (ता. ३१) भिवंडी न्यायालयात हजर करण्यात आले होते. त्यामुळे मारहाण करणाऱ्या तीन पुरुष व पाच महिलांना न्यायालयाने बुधवार (ता. २) पर्यंत पोलिस कोठडीत ठेवण्याचे आदेश दिले आहेत.
भिवंडी महापालिकेच्या प्रभाग समिती ४ च्या कार्यक्षेत्रातील नारपोली-२ देवजीनगर भागातील घर क्र.८८८ या धोकादायक इमारतीवर तोडक कारवाई करण्यापूर्वी प्रतिबंधक उपाययोजना म्हणून सहायक आयुक्त गिरीधर घोष्टेकर यांनी वीज खंडित करण्यासाठी टोरेंट पॉवर कंपनीला लेखी पत्र दिले होते. त्यानुसार कंपनीने महापालिकेच्या अधिकाऱ्यांसोबत आपले अधिकारी, कर्मचारी आणि ठेकेदार पाठवले होते. कर्मचारी, अधिकारी सरकारी काम करत असताना इमारतीमधील रहिवासी आणि इतरांनी टोरेंट कंपनीच्या अधिकाऱ्यांना व कर्मचाऱ्यांना मारहाण करून जखमी केले. त्यामुळे पालिकेच्या बिट निरीक्षकाने नारपोली पोलिस ठाण्यात मारहाण करणाऱ्यांविरोधात तक्रार केली. त्यानुसार पोलिसांनी मनसे शहराध्यक्ष मनोज गुळवी, शीतल पाटील यांच्यासह सहा जणांना रविवारी अटक केली. त्यांना सोमवारी भिवंडी दिवाणी आणि फौजदारी न्यायालयात हजर केले असता सात आरोपींना बुधवारपर्यंत पोलिस कोठडीत ठेवण्याचे आदेश दिले आहेत.