मुंबई, ता. १८ : सीबीआयने शुक्रवारी वस्तू आणि सेवा कर विभागाच्या भिवंडी आयुक्तालयात नियुक्त अधीक्षकाला लाचप्रकरणी अटक केली. हेमंत कुमार असे आरोपी अधिकाऱ्याचे नाव असून सीबीआयने आरोपीच्या मुंबई आणि गाझियाबाद येथील ठिकाणांवर छापेमारी केली आहे. या कारवाईत सीबीआयकडून ४२.७ लाख रुपये रोख आणि इतर कागदपत्रे जप्त करण्यात आली. एका खासगी कंपनीचा जीएसटी परतावा रद्द करण्यासाठी आरोपी अधिकाऱ्याने कंपनीकडे ३० लाख रुपयांची लाच मागितल्याचा आरोप आहे. या तक्रारीवरून प्राथमिक चौकशी केल्यानंतर आरोपी अधिकारी कुमार यांच्यावर गुन्हा दाखल करण्यात आला होता. सीबीआयने आरोपी अधिकाऱ्याला पकडण्यासाठी सापळा रचला. त्याप्रमाणे लाच घेताना आरोपी कुमारला सीबीआयने पकडले. आरोपीला मुंबईतील विशेष सीबीआय न्यायालयाने २१ ऑगस्टपर्यंत सीबीआय कोठडी सुनावली आहे.