मुरबाड, ता. २० (बातमीदार) : काळू नदीच्या पात्रात बुडालेल्या हैदराबाद येथील आयटी इंजिनिअर तरुणाचा मृतदेह ड्रोनच्या साह्याने शोधण्यात अखेर सात दिवसांनी पोलिसांना यश मिळाले आहे. अभिषेक रावतळ (वय २९) असे त्याचे नाव आहे. शनिवारी (ता. १२) काळू नदीच्या पात्रात तो बुडाला होता. मात्र त्याचा मृतदेह शोधण्यात यश येत नव्हते. गत शनिवारी हैद्राबाद येथून चार तरुण दुपारी दोनच्या सुमारास माळशेज घाटाच्या पायथ्याशी वसलेल्या थितबी येथील धबधब्यावर गेले होते. त्यातील एक तरुण अभिषेक काळू नदीमध्ये वाहून गेला होता. त्याचा मृतदेह सापडला नव्हता. पोलिसांनी सात दिवस या तरुणाचे शोधकार्य सुरू ठेवले होते. रायगड बचाव पथक, मुरबाड तालुक्यातील सामाजिक कार्यकर्ते अनिल घरत, हरेश सानप, दीपक विशे, थितबी ग्रामस्थ यांनी शनिवारी पुन्हा एकदा ड्रोनच्या साह्याने शोधमोहीम हाती घेतली. यावेळी ड्रोन धबधब्याच्या प्रवाहाच्या दिशेने आतमध्ये टाकला असता अभिषेकचा मृतदेह तेथे अडकल्याचे आढळले. मृतदेहाचे ठिकाण समजल्याने बचाव पथकाने अँकर हुकच्या मदतीने मृतदेहाला बाहेर काढले. मृतदेह कुटुंबीयांकडे सोपविण्यात आला.