पनवेल, ता. २१ (बातमीदार)ः रक्षाबंधनाचा सण अवघ्या दहा दिवसांवर येऊन ठेपल्याने राखी खरेदीसाठी बाजारात ग्राहकांची गर्दी वाढू लागली आहे. फॅन्सी, पेंडंट, स्टोन, कुंदन, अमेरिकन डायमंड, झरदोजी, लुंबा, डोरी प्रकारच्या राख्या बाजारात आल्या असून कोट्यवधींची उलाढाल होण्याची शक्यता आहे.
रक्षाबंधनानिमित्त आतापासूनच सर्वत्र उत्साह संचारल्याचे चित्र आहे. बाजारात राख्यांच्या खरेदीला सुरुवात झाली असून मोठ्या प्रमाणात राख्या बाजारात आल्या आहेत. त्यामुळे गेल्या वर्षीच्या तुलनेत यंदा राख्यांच्या दरात पाच ते आठ टक्के वाढ झाली आहे. आतापर्यंत ठोक बाजारात ७५ टक्के राख्यांची विक्री झाली असून किमतीऐवजी रंगसंगतीतील राख्यांना अधिक पसंती असल्याचे विक्रेत्यांकडून सांगण्यात येत आहे.
-----------------------------
कळंबोलीत अर्ध्या किमतीत राखी
भावा-बहिणीच्या सणाला महागाईची झळ बसत आहे. त्या अनुषंगाने कळंबोली वसाहतीमध्ये रामदास शेवाळे प्रतिष्ठानमार्फत अर्ध्या किमतीत राखीचा स्टॉल लावण्यात आला आहे. सणाच्या उत्साहावर महागाईचा अडसर येऊ नये, या उद्देशातून हा स्टॉल लावल्याचे शिवसेनेचे जिल्हाप्रमुख रामदास शेवाळे यांनी सांगितले.
----------------------------------------------
बाजारपेठेत दोन रुपयांपासून ते पाचशे रुपयांच्या राख्या उपलब्ध आहेत. धाग्यापासून तयार केलेल्या राखीची किंमत दोन रुपयांपासून उपलब्ध आहे. याशिवाय अनोख्या राख्या पाचशे रुपयांपर्यंत विक्रीस आल्या आहेत. दिवसेंदिवस राख्यांचा बाजार वाढत आहे.
- अक्षय नलावडे, राखीविक्रेता, कळंबोली