शिवमंदिरात भोलेनाथाचा गजर
कळंबुसरे गावात शिव यागाच्या पठणासह यज्ञ
उरण, ता. २१ (वार्ताहर)ः उरण परिसरात कळंबुसरे निसर्गाच्या कुशीत वसलेले छोटेसे गाव आहे. या गावाच्या दक्षिणेला असलेल्या पुरातन स्वयंभू शिव मंदिरात श्रावणातील पहिल्याच सोमवारी शिवभक्तांनी मोठ्या संख्येने गर्दी केली होती. पहाटेपासूनच मंदिरात शिवयागाच्या पठणासह यज्ञ करण्यात आला. या वेळी कळंबुसरे गावातील पन्नास जोडप्यांनी सहभाग घेतला होता.
कळंबुसरे गावातील शिवमंदिराच्या पूर्व, दक्षिण व पश्चिमेला हिरव्या झाडांची डोंगरकडा, उत्तरेस टेकडीवर वसलेले गाव आणि सभोवताली भातशेतीची फुललेली निसर्गाची नवलाई, मांगल्याचा घंटानाद कानात घुमत राहतो. पुरातन काळापासून लाखो भक्तांचे श्रद्धास्थान असणाऱ्या या स्वयंभू शिवमंदिरातील शिवलिंग मनाला भुरळ घालते. या मंदिराच्या गाभाऱ्यात शिवलिंगाच्या बाजूला कालभैरव, हनुमंताची शीला तसेच नंदी आहे. अशा या निसर्गरम्य तसेच शांततामय मंदिरात श्रावण सोमवारनिमित्त भाविकांची मोठी गर्दी झाली होती. या वेळी पहाटेपासूनच हरिपाठ, कीर्तन, प्रवचन अशा विविध कार्यक्रमांबरोबर भाविकांसाठी महाप्रसादाचे वाटप करण्यात आले.
--------------------------------------------------------
दर्शनासाठी भाविकांच्या रांगा
पहिला श्रावणी सोमवार आणि नागपंचमीचा योग जुळून आल्याने नवी मुंबई शहरातील शिवमंदिरांत भाविकांनी दर्शनासाठी गर्दी केली होती. अनेक मंदिरांच्या बाहेरील मुख्य रस्त्यापर्यंत भाविकांच्या रांगा लागल्या होत्या. शहरातील पावणेश्वर तसेच वाशी येथील जागृतेश्वर प्राचीन शिवमंदिरासह इतरही ठिकाणी असणाऱ्या मंदिरांत भाविकांनी भोलेनाथाच्या दर्शनासाठी गर्दी केली होती.