नवी मुंबई, ता. २१ (वार्ताहर) : घणसोली सेक्टर- ७ मधील झोपडपट्टीत बेकायदा वास्तव्य करणाऱ्या तीन बांगलादेशींना दहशतवादविरोधी पथकाच्या मुंबईतील चारकोप युनिटने अटक केली. कमल हुसेन अब्दुल शेख (२७), मोहम्मद मिठू युसुफ खान (४८) व सिकंदर अकील मुल्ला (५४) अशी या तिघांची नावे असून दोन वर्षांपासून वास्तव्यास असल्याचे तपासात उघड झाले आहे.
घणसोली सेक्टर- ७ मधील झोपडपट्टीत बांगलादेशी बेकायदा वास्तव्य करत असल्याची माहिती दहशतवादविरोधी पथकाच्या मुंबईतील चारकोप युनिटला मिळाली होती. या माहितीच्या आधारे पथकाने गुरुवारी (ता. १७) मध्यरात्री रबाळे पोलिसांच्या मदतीने अडीचच्या सुमारास घणसोली सेक्टर-७ मधील झोपडपट्टीत छापा मारला होता. या कारवाईत तीन बांगलादेशी नागरिकांचे बेकायदा वास्तव्य असल्याची माहिती समोर आली आहे. तसेच तिघांनी विनापासपोर्ट वैध कागदपत्रांशिवाय घुसखोरीच्या मार्गाने भारतात प्रवेश केल्याने विदेशी व्यक्ती अधिनियम तसेच पारपत्र अधिनियमानुसार रबाळे पोलिस ठाण्यात गुन्हा दाखल केला आहे.