परळमध्ये ‘होऊ द्या चर्चा’ कार्यक्रमाचे आयोजन
शिवडी (बातमीदार)ः शिवसेना ठाकरे गटाकडून मुंबई महानगरपालिका प्रशासनाने सुशोभीकरणाच्या आणि रस्ते सिमेंट क्राँक्रीटीकरणाच्या नावाखाली केलेला भ्रष्टाचार आणि सध्या राजकारणाचे झालेले अधःपतन या विषयावर ‘होऊ द्या चर्चा’ या कार्यक्रमाचे आयोजन केले आहे. हा कार्यक्रम शिवसेना शाखा क्रमांक २०४ च्या वतीने मंगळवारी (ता. २२) सायंकाळी ६.३० वा. परळ येथील बेस्ट वसाहत, गणेशोत्सव मंडप येथे होणार आहे. या कार्यक्रमास खासदार अरविंद सावंत, आमदार अजय चौधरी, विभागप्रमुख आशिष चेंबूरकर, माजी महापौर किशोरी पेडणेकर यांची प्रमुख उपस्थिती असणार आहे; तर या कार्यक्रमात जास्तीत जास्त नागरिकांनी सहभागी होऊन प्रश्न विचारावेत, असे आवाहन माजी नगरसेवक अनिल कोकीळ यांनी केले आहे.
...................
गुणवंतांचा गुणगौरव सोहळा
प्रभादेवी (बातमीदार) : अंधेरी (प) येथील नवकिरण मंडळाच्या वतीने गुणगौरव सोहळ्याचे आयोजन करण्यात आले होते. या वेळी शाळा-महाविद्यालय व विविध क्षेत्रांत उल्लेखनीय कामगिरी करणाऱ्या गुणवंत विद्यार्थ्यांचा नवकिरण मंडळाच्या वतीने सन्मानचिन्ह देऊन गुणगौरव करण्यात आला. याप्रसंगी राष्ट्रपतींच्या हस्ते नर्सिंग क्षेत्रातील फ्लोरेन्स नाईटिंग पुरस्कार मिळालेल्या नवकिरण मंडळाची माधवी राणे-चिखले हिचा विशेष सन्मान करण्यात आला. नवकिरण मंडळाचे अध्यक्ष मधुसूदन सदडेकर, रवींद्र चिले, मंडळाचे सचिव सुभाष राणे, महेंद्र सुर्वे, रिना मुलिया, संतोष चव्हाण आदी उपस्थित होते.