मुंबई, ता. २१ : कुर्ला पश्चिमेतील शिवमंदिर परिसरात हॅप्पी होम बंगल्याच्या मागील बाजूची संरक्षक भिंत खालील चाळीवर कोसळून झालेल्या दुर्घटनेत वैष्णवी राजपती (१८) या तरुणीचा मृत्यू झाला. हीर घटना सोमवारी सायंकाळी ७.३० वाजता घडली. अंदाजे आठ फूट उंचीची ही संरक्षक भिंत राजपती कुटुंबीयांच्या घरासह एकूण चार घरांवर अचानक कोसळली. यावेळी वैष्णवी ही घरात मोबाईल बघण्यात व्यस्त होती. तिची लहान बहीण काही कामासाठी बाजूलाच गेली होती. या घटनेत वैष्णवीच्या डोक्यावर भिंतीचा मोठा भाग पडल्याने ती गंभीर जखमी झाली. शेजाऱ्यांनी तात्काळ घटनास्थळी धाव घेत तिला नजीकच्या भाभा रुग्णालयात उपचारासाठी नेले; मात्र तेथील डॉक्टरांनी तिला मृत घोषित केले.
घटनास्थळी चार घरांवर भिंतीचा भाग कोसळल्याने पोलिस व पालिका अधिकाऱ्यांनी तात्काळ धाव घेऊन मदतकार्य केले. तसेच, सुरक्षिततेच्या कारणास्तव चार घरांतील २० जणांना पालिकेने नजीकच्या शाळेत स्थलांतरित केले आहे. काहीजण त्यांच्या नातेवाईकांकडे गेले आहेत.