बोईसर, ता. २८ (बातमीदार) : महाराष्ट्र शासनाचा ‘वन स्टेट वन ई-चलान’ एप्रिल २०१९ पासून पालघर जिल्ह्यात कार्यान्वित झाला आहे. वाहतूक नियमाचे उल्लंघन करणाऱ्या चालकांवर ई-चलान प्रणालीद्वारे कारवाई केली जात आहे. ई-चलान प्रणालीद्वारे कारवाई केलेल्या चालकांनी ई-चलान रकमेचा भरणा करावा; अन्यथा ९ सप्टेंबर रोजी होणाऱ्या लोकअदालतीत हजर राहावे, असे निर्देश वाहतूक पोलिस प्रशासनाने दिले आहेत. तसेच ई-चलान भरण्यासाठी विविध पर्यायही उपलब्ध केले आहेत.

वाहतुकीचे नियम मोडणारे चालक अनेकदा ई-चलानची तडजोड रक्कम भरण्यास तयार नसतात. अशा वाहनचालकांचे चलान अनपेड या शीर्षकाखाली प्रलंबित असते. अशा चालकांनी कारवाईनंतर काही दिवसांत तडजोड रक्कम जमा करणे आवश्यक असते; मात्र शहर वाहतूक पोलिसांनी कारवाई केलेल्या चालकांनी ई-चलानची रक्कम जमा केली नसल्याची बाब समोर आली आहे. अशा चालकांना वाहतूक नियत्रंण शाखेच्या कार्यालयाकडून वारंवार मेसेज पाठवण्यात आले आहेत. यानंतरही चालकांनी चलानची रक्कम जमा केली नसल्याने त्यांच्याविरोधात न्यायालयात खटला भरण्याचा निर्णय प्रशासनाने घेतला; तर शेवटची एक संधी म्हणून ९ सप्टेंबरपर्यंत चलानची रक्कम जमा करा, असा इशारा पोलिसांनी दिला आहे.

ई-चलान कुठे भरू शकता?
पालघर पोलिस ठाणे चौकीशेजारी जिल्हा वाहतूक शाखा चौकी, रेल्वे स्टेशन, पालघर (पश्चिम) येथे रक्कम रोख स्वरूपात अथवा डेबिट कार्डद्वारे, क्रेडिट कार्डद्वारे ई-चलान भरू शकता. चाररस्ता, पाचबत्ती वाहतूक शाखा रेल्वे स्टेशनचौकी, बोईसर रेल्वे स्टेशन चौकी, मधुरनाका, ओसवाल नाका, चारोटी कोस्टल चौकी, तलासरी नाका चौकी, खंडेश्वरी नाका, कुडुस चौकी, डहाणू, सफाळा तसेच वाणगाव, घोलवड, जव्हार, विक्रमगड, मोखाडा या विभागातील वाहतूक अंमलदारांकडे ई-चलानची रक्कम भरू शकता.