कासा, ता. ३१ (बातमीदार) : गंजाड सोमनाथ जिल्हा परिषद शाळेत ग्रामपंचायत गंजाड व हिरल फॉर्म गंजाड यांच्या विद्यमाने कपडेवाटपाचा कार्यक्रम आयोजित केला होता. ठाण्यातील उद्योजक दीपक भेदा व गिरीश भेदा यांच्यातर्फे शाळेतील मुलांना कपडे वाटप करण्यात आले. गंजाड ग्रामपंचायतीमधील १२ जिल्हा परिषद शाळांतील पहिली ते पाचवीमधील १०५० विद्यार्थ्यांना शर्ट, टी-शर्ट, पॅन्ट तसेच मुलींना ड्रेस, गावातील महिलांना हजार साड्यांचे वाटप करण्यात आले. रक्षाबंधनानिमित्त मुला-मुलींना कपडे व गावातील महिलांना साड्या भेट देण्यात आल्या.

या वेळी गंजाडचे सरपंच अभिजीत देसक वारली पेंटिंग व शाल श्रीफळ देऊन आलेल्या मान्यवरांचा सन्मान केला. दीपक भेदा यांनी याआधीदेखील ४०० गरजू लोकांना ताडपत्री व प्लास्टिक दिल्याचे त्यांनी सांगितले. या कार्यक्रमाला गिरीश भेदा, राजेंद्र सुर्वे, दत्ता गोरड, लता भेदा, जस्मिन शहा, डहाणू पंचायत समितीचे विस्तार अधिकारी कृष्णा गुरोडा, सोनू सिंग पाटील, उपसरपंच कौशल कामडी, कल्पेश ठाकरे, विलास वरखंडे, विनोद गडग, कैलास दळवी, मनीषा कोदे आदी उपस्थित होते.