तुर्भे, ता. ९ (बातमीदार) : एपीएमसी परिसरातील पाम बीच मार्गावरील गॅरेजमुळे वाहतुकीला अडथळा निर्माण करणाऱ्या ४ जणांवर गुन्हे दाखल करण्यात आल्याची माहिती एपीएमसी वाहतूक शाखेच्या पोलिस निरीक्षक विमल बिडवे यांनी दिली. या वेळी वाहतुकीस अडथळा ठरणाऱ्या ५४ गॅरेजवर कारवाईही करण्यात आली आहे. पोलिस उपायुक्त तिरुपती काकडे यांनी सर्व वाहतूक शाखेच्या अधिकाऱ्यांना वाहतुकीला अडथळा निर्माण करणारे गॅरेजवाले आणि अन्य घटकांच्या विरोधात कारवाई करण्याचे आदेश दिले आहेत. त्यानुसार ही कारवाई करण्यात आली आहे. सेक्टर १९ या भागात पाम बीच मार्गावर चारचाकी दुरुस्तीची अनेक गॅरेज आहेत. या गॅरेजमध्ये दुरुस्तीसाठी येणाऱ्या गाड्या अनेकदा पाम बीच मार्गावर दुरुस्त केल्या जातात. त्यामुळे या मार्गावर वाहतुकीला अडथळा निर्माण होतो. याची नोंद घेत बिडवे यांनी ही धडक कारवाई केली. यापूर्वी गाड्या दुरुस्तीचे काम करत असताना पदपथावरून चालणारे पादचारी तसेच रस्त्यावरील वाहने यांना अडथळा ठरू नये, याविषयी बिडवे यांनी संबंधितांना बैठक घेऊन सूचना दिल्या होत्या. त्यानंतरही काही गॅरेज मालकांकडून याकडे दुर्लक्ष करण्यात आल्याचे आढळून आले. त्यानुसार त्यांच्यावर कारवाई करण्यात आली. दरम्यान, पहिल्यांदाच एवढ्या मोठ्या प्रमाणात कारवाई झाल्याने पाम बीच मार्गावर वाहतुकीचे अडथळे दूर झाले. त्यामुळे वाहनचालक आणि स्थानिक नागरिक समाधान व्यक्त करत आहेत.