ट्युमरमुळे शरीरात झाले विचित्र बदल
आठ वर्षे त्रस्‍त महिलेच्‍या आरोग्‍यात सुधारणा
सकाळ वृत्तसेवा
मुंबई, ता. २६ : ट्युमरमुळे शरीरात झालेल्या वेगवेगळ्या बदलांवर उपचार करण्यात डॉक्टरांना यश आले आहे. मुंबईतील ४४ वर्षीय महिलेच्या शरीरात आठ वर्षांच्या कालावधीत वेगळेच बदल होत गेले. या बदलांमुळे ही महिला कामावर जाणे टाळत होती. या शारीरिक बदलांमध्ये प्रामुख्याने नाकाचा आकार वाढणे, हातापायांवर पुरुषांसारखे केस वाढणे, मासिक पाळी अनियमता, वजन वाढणे तसेच आवाजात बदल असे विचित्र बदल होत गेले. त्यामुळे महिलेला घरातून बाहेर निघायला लाज वाटत होती.
सर्वात आधी ओटीपोटाची सोनोग्राफी करून पीसीओडीचा आजार असल्याचे सांगत औषधे सुरू केली. पण, शारीरिक बदलात कोणताही फरक दिसून आला नाही. एकदा महिलेने कानाचे उपचार घेण्यासाठी ईएनटी डॉक्टरांना भेट दिली, त्या वेळी हा आजार मेंदूसंबंधित असल्याची शक्यता वर्तवली.

असे झाले उपचार
ठाण्याच्या सोलारीसर रुग्णालयातील मेंदूविकारतज्ज्ञ शल्य चिकित्सक डॉ. अमित ऐवळे यांनी सांगितले की, रुग्णाच्या प्रमुख वैद्यकीय तपासण्या केल्यावर तिला अँक्रोमेगालीचा त्रास जाणवला. एमआरआय आणि तपशीलवार हार्मोनल मूल्यांकन केल्‍यानंतर मेंदूच्या पिट्यूटरी ग्रंथीमध्ये ट्युमर आढळला. याच ट्युमरमुळे महिलेच्या शरीरात आठ वर्षांपासून बदल झाले होते. ट्रान्स नेसल पिट्युटरी मॅक्रो एडेनोमा एक्सिजन सर्जरी म्हणजेच नाकाद्वारे एंडोस्कोपिक तंत्रज्ञानाचा वापर करून ट्युमर काढला. सर्जरी यशस्वी झाली आणि चार दिवसांत महिला घरी गेली. आता या महिलेच्या अवयवांमध्ये झालेली वाढ कमी होऊन महिलेची मासिक पाळी नियमित झाली. या केसमध्ये रोगाचे निदान वेळेवर न झाल्याने महिलेला त्रास सहन करावा लागला, असेही डॉक्टरांनी सांगितले.

काय आहे अँक्रोमेगाली
अँक्रोमेगाली हा एक हार्मोनचा विकार आहे. जो प्रौढांमध्‍ये ग्रोथ संप्रेरकाच्‍या अतिस्रावामुळे होतो. यामध्ये शरीर जास्त प्रमाणात हार्मोन बनवते. प्रामुख्याने पिट्यूटरी ग्रंथीमध्ये हार्मोन्स वाढतात. या ग्रंथी शरीराची शारीरिक वाढ नियंत्रित करतात. जर हे हार्मोन्स जास्त प्रमाणात वाढले तर हाडे, कूर्चा, शरीराचे अवयव आणि इतर ऊतींचा आकार वाढत जातो.