खारघर, ता.२ (बातमीदार) : गेल्या काही दिवसांपासून पावसाचा लपंडाव सुरू असल्याने त्याचा विपरीत परिणाम मानवी आरोग्यावर होत आहे. खारघर शहरात डासांचा प्रादुर्भाव वाढल्याने डेंगी, हिवताप, ताप, खोकला अशा साथीच्या आजारांचे प्रमाण वाढले आहे. त्यामुळे गेल्या काही दिवसांपासून खारघरमधील खासगी तसेच शासकीय रुग्णालये रुग्णांनी भरली असल्याचे चित्र आहे.
खारघर वसाहतीत आजही अनेक भागांत कचऱ्याचे ढीग, मलनिस्सारण वाहिन्या भरल्याने रस्त्यावरून दुर्गंधीयुक्त पाणी वाहताना दिसून येते. काही भागात पाण्याचा निचरा होत नाही. रस्ते, गटारे तुडुंब भरली आहेत. त्यामुळे डासांची उत्पत्ती वाढल्याने ताप, हिवतापाच्या रुग्णांत वाढ होताना दिसत आहे. ऑगस्ट महिन्यात खारघरमध्ये डेंगीचे ३२ रुग्ण आढळून आले होते; तर पालिकेच्या आरोग्य विभागाने दिलेल्या माहितीनुसार सप्टेंबरमध्ये खारघरमधील नागरी आरोग्य आणि खासगी रुग्णालयांत हिवतापाचे ४५, तर डेंगीच्या ५४ रुग्णांची नोंद झाली आहे. त्यामुळे साथीच्या आजारांनी त्रस्त नागरिकांची संख्या वाढतच असल्याने पनवेल महापालिकेचा आरोग्य विभाग सतर्क झाला आहे.
------------------------------------------
विविध तपासण्यांमुळे खिशाला झळ
खारघर परिसरात काही दिवसांपासून डेंगी, सर्दी, खोकला, ताप, घसा दुखणे, तांबड्या, पांढऱ्या पेशी कमी होणे, अशक्तपणा यामुळे शहरातील नागरिक बेजार आहेत. दवाखान्यात तपासणी अथवा भरती झाल्यानंतर रक्त व लघवी तपासण्याचा सल्ला दिला जात असल्याने पॅथॉलॉजिकल लॅबचा व्यवसाय तेजीत आला आहे. दोनशे रुपयांपासून हजार रुपयांपर्यंत तपासण्यांचे दर असल्याने खिशाला झळ बसत आहे.