ठाणे, ता. ३ (वार्ताहर) ः तरुणींना देहविक्री करण्यास भाग पडणाऱ्या एका महिला एजंटला ठाणे पोलिसांच्या अनैतिक मानवी वाहतूक प्रतिबंध पथकाने बदलापूर शहरातून अटक केली. एजंट महिलेच्या ताब्यातून एका अल्पवयीन मुलीची आणि एका २० वर्षीय तरुणीची सुटका करण्यात केली.

ठाणे अनैतिक मानवी वाहतूक प्रतिबंध कक्षाच्या पथकास बदलापूर शहरात एक महिला एजंट देहविक्रयासाठी मुली पुरवते अशी माहिती मिळाली होती. माहिती मिळताच पोलिसांनी २ नोव्हेंबर रोजी सायंकाळी ५.४५ वाजेच्या सुमारास बदलापूर पूर्वेच्या स्टेशन समोरील हॉटेल नवरत्न पॅलेसमध्ये छापा मारला. यावेळी एका महिला एजंटला पोलिस पथकाने अटक केली. तिच्या तावडीतून एका अल्पवयीन मुलीची व एका तरुणीची सुटका करण्यात आली. आर्थिकदृष्टया कमकुवत असणाऱ्या तरुणींना देहविक्री करण्यास भाग पाडून त्यातून मिळालेल्या पैशांवर उपजीविका करण्याचे काम ही महिला एजंट करीत होती. या प्रकरणी बदलापूर पूर्व पोलिस ठाण्यात गुन्हा दाखल करण्यात आला आहे.