उरण, ता. ४ (बातमीदार) : दिव्यांगांचे आयुष्य सुकर व्हावे व त्यांना काहीतरी उत्पन्नाचे साधन मिळावे म्हणून नवघर ग्रामपंचायतीच्या माध्यमातून दिव्यांगांना निधीचे वाटप करण्यात आले. या निधीच्या माध्यमातून दिव्यांग स्वतःच्या पायावर उभे राहतील या हेतूने हा निधीवाटप करत असल्याचे नवघर ग्रामपंचायतीच्या माध्यमातून सांगण्यात आले.

उरण तालुक्यातील नवघर ग्रामपंचायतीमार्फत वर्षभरात शासनाच्या विविध सेवासुविधा, योजना, अभियान प्रभावी राबविले जातात. शासनाच्या सेवासुविधा तळागाळात, सर्वांपर्यंत पोहोचविण्याचे काम नवघर ग्रामपंचायतीमार्फत सुरू आहे. ग्रामपंचायतीने स्वतःच्या उत्पन्नातील पाच टक्के दिव्यांग कल्याण निधीतून नवघर, नवघरपाडा, कुंडेगाव येथील २२ अपंग लाभार्थ्यांना प्रत्येकी २० हजार रुपये व्यवसायासाठी वाटप केले. तसेच जुलैमध्ये रुपये १२ हजारप्रमाणे २६ हजार ४०० असे ७,७४, ००० रुपये दिव्यांगांना वाटप केले. यावेळी सरपंच सविता मढवी, उपसरपंच दिनेश बंडा, ग्रामविकास अधिकारी गुरुप्रसाद म्हात्रे, ग्रामपंचायत सदस्य उपस्थित होते.