नवी मुंबई, ता. १३ (वार्ताहर) : खारघर येथून मैत्रिणीसह दुचाकीवरून तळोजा येथे घरी निघालेल्या तरुणीच्या हातातील आयफोन दुचाकीवरील दोघा लुटारूंनी खेचून पलायन केल्याची घटना रविवारी (ता. १२) पहाटे ३.३० वाजण्याच्या सुमारास खारघर येथे घडली. या प्रकरणी खारघर पोलिस ठाण्यात गुन्हा दाखल करण्यात आला आहे. तळोजा सेक्टर-२१ मध्ये राहणारी २३ वर्षीय महेक शनिवारी रात्री खारघर सेक्टर-३५ मधील मैत्रिण अफराज हिच्याकडे गेली होती. त्यानंतर रविवारी पहाटे सव्वा तीन वाजण्याच्या सुमारास महेकला तिच्या घरी जायचे होते. त्यामुळे अफराज आपल्या स्कूटीवरून तिला सोडण्यासाठी निघाली. दोघी मैत्रिणी तळोजाच्या दिशेने जात असताना सेक्टर-३५ भागात दुचाकीवरील दोघांनी स्कूटीवर पाठीमागे बसलेल्या महेकच्या हातातील ५२ हजार रुपये किंमतीचा आयफोन जबरदस्तीने खेचून उलट्या दिशेने पलायन केले. अंधारात तरुणींना लुटारूंच्या दुचाकीचा नंबर पाहता आला नाही. त्यानंतर महेकने सकाळी खारघर पोलिस ठाण्यात तक्रार दाखल केली.