सकाळ वृत्तसेवा
मुंबई, ता. १६ : दिवाळी आणि छटपूजेसाठी मध्य रेल्वेकडून विशेष गाड्या चालविण्यात येत असल्याने उपनगरी लोकल गाड्यांच्या वेळापत्रकाला फटका बसत आहे. यामुळे गुरुवारी दुपारी अप जलद मार्गावरील लोकल सेवेचे वेळापत्रक कोलमडले होते. विलंबाने धावणाऱ्या लोकलमुळे प्रवाशांना सामना करावा लागला आहे.

दिवाळी, छटपूजेसाठी गावी जाणाऱ्या प्रवाशांची अतिरिक्त गर्दी लक्षात घेऊन मध्य रेल्वेने यंदा ४५० पेक्षा जास्त उत्सव विशेष गाड्या चालविण्यात येत आहेत. त्यामुळे विशेष गाड्यांमुळे रेल्वे मार्गावर अतिरिक्त भार येत आहे. तसेच, लांबपल्ल्याचा गाड्यांना मार्गिका उपलब्ध करून देत असल्याने जलद लोकल सेवांचा वेळापत्रकारवर परिणाम दिसून येत आहे. परिणामी प्रवाशांना नाहक मनस्ताप होत आहे. गुरुवारी दुपारी जलद मार्गावरील अनेक लोकल सेवा विलंबाने धावत असल्याने प्रवाशांना लोकल गर्दीचा सामना करावा लागला आहे. मेल-एक्स्प्रेससाठी ठाणे-दिवा स्वतंत्र मार्ग उपलब्ध होऊनही लांब पल्ल्याच्या आणि उपनगरी रेल्वेचा वक्तशीरपणा सुधारला नसल्याचा अनुभव मध्य रेल्वेच्या प्रवाशांना येत आहे.