डोंबिवली, ता. २१ (बातमीदार) : सवाई गंधर्वनिर्मित गंधर्वगान हा अभंग, नाट्यसंगीत, उपशास्त्रीय गायनाचा अनोखा कार्यक्रम नुकताच पार्ल्याच्या दीनानाथ मंगेशकर नाट्यगृहात झाला. आनंदगंधर्व पंडित आनंद भाटे आणि स्वराधीश डॉ. भरत बलवल्ली यांनी श्रोत्यांना अक्षरशः मंत्रमुग्ध केले. डॉ. भरत बलवल्ली यांच्या गायनाने कार्यक्रमाला सुरुवात झाली. त्यानंतर पंडित आनंद भाटे यांनी या स्वरपहाटमध्ये आपल्या स्वरांनी रसिकांना मंत्रमुग्ध केले. व्यास क्रिएशन्स आणि वीर सेनानी फाऊंडेशन यांच्या सहयोगाने झालेल्या या कार्यक्रमात भारतीय जवानांसाठी मदत केली.

कार्यक्रमाचे निवेदन मिलिंद कुलकर्णी यांनी केले. ऑर्गनवर ज्येष्ठ वादक मकरंद कुंडले, तबलासाथ प्रसाद करंबेळकर यांनी दिली. बासरी वरद कठापूरकर, पखवाज दादा परब आणि तालवाद्य एकनाथ परब यांनी साथसंगत केली. ''गंधर्वगान''ची संकल्पना आणि निर्मिती आकाश भडसावळे याची होती. ''सवाई गंधर्व'' या संस्थेने कार्यक्रमाची निर्मिती केली. कार्यक्रमाची सूत्र तपस्या नेवे यांनी हाताळली आणि व्यवस्थापन राकेश तळगावकर यांचे होते.