मोबाईलवर गेम खेळण्यास
वडिलांनी मनाई केल्याने
मुलाची आत्महत्या
मुंबई, ता. १८ : वडिलांनी मोबाईलवर गेम खेळू न दिल्याने १६ वर्षांच्या मुलाने मुंबईत आत्महत्या केल्याची धक्कादायक घटना शुक्रवारी (ता. १७) उघडकीस आली. मालवणी पोलिसांनी या प्रकरणी अपघाती मृत्यूची नोंद केली आहे.
वडिलांनी दिलेल्या माहितीनुसार, मुलाला मोबाईलवर गेम खेळण्याचे व्यसन जडले होते. त्यांनी अनेकदा त्याला जास्त वेळ गेम न खेळण्याचा इशारा दिला होता; परंतु त्याने दाद दिली नाही. मोबाईल खेळायला दिला नाही तर स्वतःला हानी पोहोचवण्याची धमकीही त्याने दिली होती. गुरुवारी रात्री ११.३० च्या सुमारास वडिलांनी मुलाचा मोबाईल हिसकावून घेत त्याला झोपायला सांगितले. त्यानंतर सर्व कुटुंब झोपी गेले. शुक्रवारी सकाळी १०.३० च्या सुमारास वडिलांना जाग आली तेव्हा त्यांना त्यांचा मुलगा स्वयंपाकघरात गळफास घेतल्याच्या स्थितीत आढळला. त्यांनी तातडीने त्याला एका खासगी रुग्णालयात नेले. मात्र, डॉक्टरांनी त्याला मृत घोषित केले. मालवणी पोलिसांनी रुग्णालयात जाऊन मुलाच्या वडिलांचा जबाब नोंदवला. पोलिस शवविच्छेदन अहवालाच्या प्रतीक्षेत आहेत.