अंधेरी स्‍थानकात सापडले नवजात बालक
अंधेरी, ता. २३ (बातमीदार) ः अंधेरी रेल्‍वे स्‍थानकात नवजात बालक सापडले आहे. या बालकाला रेल्‍वे पोलिसांच्‍या स्‍वाधीन करण्यात आले असून पुढील तपास करण्यात येत आहे.
येथील रेल्वे स्थानकावर २१ नोव्हेंबर रोजी संध्याकाळी सहा वाजण्याच्या सुमारास प्लॅटफॉर्म क्रमांक आठच्या दुभाजकावर एका लाकडी बॉक्समध्ये या नवजात बालकाला ठेवण्यात आले होते. या वेळी पुलावरून जाणाऱ्या एका प्रवाशाने मुलाचा रडण्याचा आवाज ऐकून तो फलाट क्रमांक आठवर गेला. या वेळी बॉक्‍स उघडून पाहिले असता आतमध्ये लाकडी पेटीत नवजात बालक पडलेले दिसले. त्‍याने त्‍वरित याची माहिती अंधेरी रेल्‍वे पोलिसांना दिली. या वेळी रेल्वे पोलिसांनी मुलाला ताब्यात घेऊन जवळच्या रुग्णालयात दाखल केले. सध्या या नवजात बालकाची प्रकृती स्थिर आहे. याप्रकरणी अंधेरी रेल्वे पोलिसांनी आयपीसी कलम ३१७ अंतर्गत गुन्हा दाखल केला असून या प्रकरणाचा तपास सुरू केला आहे.