भिवंडी, ता. २५ (बातमीदार) : माणकोली-दापोडा मार्गावर चोरटे अंगावरील सोने लुटून नेत असल्याचे सांगून तोतया पोलिसांनी ज्येष्ठ नागरिकाला लुटल्याची घटना घडली आहे. याप्रकरणी नारपोली पोलिस ठाण्यात गुन्हा दाखल करण्यात आला आहे. माणकोली भागात अशा घटना वारंवार घडत असल्याने नागरिकांमध्ये भीतीचे वातावरण पसरले आहे. तालुक्यातील माणकोली गावाजवळ लोढा अप्परच्या कटियारा इमारतीमध्ये राहणारे सेवानिवृत्त कर्मचारी नीळकंठ गंगाधर वेश्‍वीकर हे बुधवारी (ता. २२) पेट्रोल संपल्याने पेट्रोल घेण्यासाठी त्यांच्या स्कूटरने गजानन पेट्रोल पंपाकडे जात होते. त्या वेळी पेट्रोल पंपासमोर उभ्या असलेल्या दोन व्यक्तींनी पोलिस असल्याचे सांगून त्यांना थांबवले. पुढे रस्त्यात चेन स्नॅचिंग होत आहे, त्यामुळे गळ्यात घातलेली चेन व अंगठी काढून कागदात ठेवा असे सांगितले. त्यामुळे घाबरलेल्या नीळकंठ वेश्‍वीकर यांनी सर्व दागिने काढून कागदात ठेवायला पोलिसांकडे दिले. त्यानंतर भामट्यांनी त्यांना बोलण्यात गुंतवून चतुराईने दगडाचे खडे दुसऱ्या कागदात गुंडाळून दिले. त्यानंतर खरे दागिने घेऊन दोघांनीही पळ काढला. याप्रकरणी वेश्‍वीकर यांनी ६५ हजार रुपयांचे दागिने तोतया पोलिसांनी पळवल्याची तक्रार नारपोली पोलिस ठाण्यात दाखल केली. पोलिसांनी गुन्हा नोंद करून तपास सुरू केला आहे.