ठाणे, ता. २८ (वार्ताहर) : ठाण्याच्या विविध प्रभाग समितीत विविध कारणास्तव लागलेल्या आगीच्या घटनांमध्ये मोठ्या प्रमाणात वित्तहानी झाली आहे; तर नोव्हेंबर महिन्यात २७ दिवसांत तब्बल ९७ आगीच्या घटना घडल्या आहेत; तर यामध्ये तीन जण किरकोळ जखमी झालेले आहेत; तर दोन वृद्धांचा गुदमरून मृत्यू झाल्याची घटना समोर आली आहे. दरम्यान, आगी लागतात कशामुळे, याबाबत अनभिज्ञता असली तरीही बहुतांश आगी या शॉर्टसर्किटमुळे लागल्याचा प्राथमिक अंदाज अग्निशमन दल आणि आपत्ती व्यवस्थापन विभागाकडून वर्तवण्यात येत आहे.

नोव्हेंबरच्या २७ दिवसांमध्ये ठाण्यात मोठ्या प्रमाणात आगीच्या घटना घडलेल्या आहेत. एसी युनिटला आग लागणे, कचरा पेटणे, विद्युत मीटर बॉक्सला आग लागणे, सिलिंडर गळतीमुळे आग, सिलिंडरचा स्फोट होणे अशा विविध प्रकारच्या घटना शहरात विविध ठिकाणी घडल्या आहेत. या घटनांमध्ये मोठ्या प्रमाणात वित्तीय हानी झाल्याचे समोर आले आहे; तर नुकत्याच घडलेल्या मुंब्रा येथील केमिकल स्फोटाच्या घटनेत तीन जण जखमी झाल्याची घटना घडली; तर ठाण्याच्या घोडबंदर रोडवरील वाघबिळ परिसरातील बंगल्यात राहणाऱ्या परिवारातील वयोवृद्ध दाम्पत्य आगीत गुदमरल्याने बेशुद्ध झाले. त्यानंतर डॉक्टरांनी त्यांना मृत घोषित केल्याची गंभीर घटना घडली.

नोव्हेंबर महिन्यात ठाणे पालिका क्षेत्रातील विविध प्रभाग समितीत लागलेल्या आगीत तीन जखमी आणि २ जणांचा गुदमरून मृत्यू झाल्याची घटना घडली आहे; तर नोव्हेंबरमध्ये सर्वाधिक आगीच्या घटना या १२ नोव्हेंबरला घडल्या आहेत. या दिवशी आपत्ती व्यवस्थापन विभागाने नोंद केलेल्या आगीच्या सर्वाधिक घटनांचा आकडा १५ एवढा होता; तर त्याखालोखाल १३ नोव्हेंबरला १० आगीच्या घटना घडल्या आहेत; तर १४ नोव्हेंबला आगीच्या ९ घटना घडल्याची माहिती पालिका आपत्ती व्यवस्थापन विभागाने दिली.