मराठी पाट्यांसाठी सर्वोच्च न्यायालयाने दिलेली दोन महिन्यांची मुदत संपुष्टात आल्यानंतरही अजूनही शहरात काही दुकानदारांनी मराठी नामफलकांबाबत निर्णय घेतलेला नाही. सीवूड्सच्या एका खासगी मॉलमध्येही या निर्णयाची अंमलबजावणी झाली नसल्याने मनसे कार्यकर्त्यांनी मॉल परिसरात ठिय्या आंदोलन केले होते. यावेळी दुकानांवरील इंग्रजी पाट्या जोपर्यंत खाली उतरवत नाहीत तोपर्यंत मॉलमधून एकही मनसे कार्यकर्ता बाहेर जाणार नाही, असा आक्रमक पवित्रा पदाधिकाऱ्यांनी घेतला होता. यावेळी आंदोलक आक्रमक झाल्याने मॅाल प्रशासनाने इंग्रजी पाट्या हटवायला सुरुवात केली आहे. तसेच सात दिवसात मॉलमधील दुकानांवरील सर्व पाट्या मराठीत करण्याचे आश्वासनही दिले आहे.